1 ka NPA patay sa away batok army

Sunday, March 14, 2010

NAKATAGBO og engkwentro batok mga rebeldeng New Peoples' Army (NPA) ang mga sakop sa 72nd Infantry Battalion ug Citizens Armed Forces and Geographical Unit (Cafgu) didto sa Barangay Sibulan, lungsod sa Sta. Cruz, Davao del Sur.

Ang taho nagbutyag nga samtang naglusad sa combat patrol ang mga Cafgu ubos ni Segeant Antonio Quiamco, nasugatan nila ang kapin kun kulang napulo ka mga armadong NPA didto sa Sitio Gurem, mga alas 8:30 ang takna sa buntag, Sabado.

Have something to report? Tell us in text, photos or videos.

Mga NPA nga gituohang sakop sa Sandatahang Yunit Propaganda sa front committee 51, nakigpinusilay sa militar nga nilungtad sa 30 minutos.

Sa paghuman sa binakbakay, usa ka wa mailhing sakop sa mga rebelde ang nakit-ang nabulit sa daghang mga samad kay naigo sa mga bala ang kalawasan niini ug wa nay gininhawa.

Gikatapad sab niini ang usa ka kalibre 30 M1 Garand riffle nga di na ma-klaro ang serial number.

Ang namatay gidala dayon sa mga sundalo didto sa Angel Funeral Parlor sa lugar samtang padayon ang ilang gihimong clearing operation kagahapong adlawa.

Mas gipakusgan karon sa mga Cafgu ug 39th Infantry Battalion ang pagsuhid sa kabukiran human nilingkod ang bag-ong pamuno sa Armed Forces of the Philippines nga si Lieutenant General Delfin Bangit.

Kabahin sab ang ilang operasyon sa pagpakgang sa bisan unsang lakang sa mga rebelde ilabi pa kay nagkaduol ang anibersaryo sa kalihukan karong Marso 29. (Orlando B. Dinoy)