USA ang patay samtang laing onse ang gikatahong samdan sa tulo ka managlahing disgrasya sa kadalanan didto sa lalawigan sa Davao del Sur, Lunes.

Unang insidente nahitabo didto sa lungsod sa Hagonoy, Davao del Sur, dapit sa dalang Paligue.

Sumala pa tulo ka mga menor de edad pulos naka-angkon og mga samad ug bun-og sa ilang kalawasan human gidaro sa naghaguros nga motorsiklo.

Ang kapulisan nag-ila sa mga biktima nga sila si Jolimar, 15; Welhim, 14; pulos molupyo sa Barangay Guihing, ug Henmar, (mga apelyido gitago kay menor) 14, molupyo sab sa Barangay Sinayawan, pulos sakop sa Hagonoy.

Sa inisyal nga imbestigasyon sa kapulisan nasuta nga nag-jogging niadtong tungora ang tulo padung sa habagatang bahin sa lungsod, apan kalit sila gidaro sa usa ka SYM nga motorsiklo, kolor itom ug nagbaton sa plakang OB 9393, nga gimaneho ni Alexander Quiñones.

Lakip ang drayber sa motor nahiagum og samad, pangos, bun-og sa ulo human mahaybol.

Mga biktima dali nga gipangdala sa duol nga bay tambalanan sa dapit apan ang na-grabehang drayber sa motor gidala sa Davao del Sur provincial hospital kinsa gideklara sa mga nag-atimang doktor nga 'dead on arrival' tungod sa grabeng samad ug bun-og nga naangkon niini.

Samtang sa pikas bahin sa alas 3 sa hapon sa susamang adlaw, usa ka itom nga TS-125 nga motorsiklo nga nagbaton sa plakang MJ 1344, nga gimaneho ni Nole Aquilala, 34, minyo kauban ang angkas niini nga si Wennie Ikling, pulos molupyo sa Makilala, North Cotabato ang naaksidente sab samtang nagdagan sa Davao-Cotabato national highway.

Sumala sa kapulisan nga pag-abot niini sa Km. 85, Barangay New Opon, sakop sa Magsaysay, Davao del Sur, kalit lang nga mitabok ang usa ka motor nga kolor pula nga Yamaha RXT 135, nagbaton sa plakang YO 2198, atbang mismo sa Police Compact.

Ang motor gimaneho ni Frederick Tabay, 30, minyo ug molupyo sa Lower Dolo, Bansalan, Davao del Sur, angkas ang 15 anyos nga si Honey Jane (menor).
Maayo kaayo nga pagkasungag sa duha ka mga motorsiklo nga miresulta sa grabeng kadaut niini.

Pulos samdan ang drayber ug angkas nila.

Mga nakasaksi sa aksidente dali nga nagdala sa mga biktima ngadto sa balay tambalanan.

Pipila ka minuto ang nilabay, usa ka barangay kagawad sab sa Dongan Pekong, Matanao, Davao del Sur, ang nakaligis tunga sa national highway didto sa Barangay Sinaragan, sakop sa dakbayan sa Digos.

Sa imbestigasyon ni Police Officer 1 Orlando Fuentes, ang kagawad giila nga si Eldy Dalumutan, 38.

Si Dalumutan nagmaneho sa kolor Blue nga Loncin motor, wala'y plaka, ug wala usab kini'y drivers license.

Sa inisyal nga imbestigasyon padung unta sa dakbayan ang kagawad apan wa kini magdahum nga kalit mitabok sa kalsada ang usa ka Flaviano Gonio, 75, molupyo sa maong barangay.

Wa kabantay ang opisyal sa barangay napunggitan gyud niini ang tiguwang nga mitabok sa dalan.

Ang biktima lakip na ang kagawad nahiagum og grabeng samad sa lawas ug gidali pagdala sa balay tambalanan.

Misamot sab kaguba ang motorsiklo sa kagawad dihang nadasmagan kini og pick-up nga kolor itom nga nagbatun sa plakang LCS 700 nga gimaneho sa usa ka Elmer Millanes, molupyo sa R. Castillo St. siyudad sa Davao .

Mga biktima, nagpabilin pa sa mga nagkadaiyang bay tambalanan sa lalawigan samtang ang uban gibalhin na didto sa Davao Medical Center tungod sa grabeng kahimtang.

Mga traffic investigators mihimo na sa ilang managlahing imbestigasyon aron ilhon ang mga sad-ang drayber sa buwag nga mga insidente. (Dondon Dinoy)