USA ang patay samtang tulo ang samarong nadala sa ospital human mibangga ang usa ka motorsiklo ngadto sa gikasugat nga  Sport Utility Vehicle (SUV) didto sa National Highway Barangay Tuburan, lungsod sa Mawab, Comval Province.

Ang biktima nga nakutloan sa iyang kinabuhi nailhan nga mao si Jemar Mole, 8, samtang ang mga samaron nailhan sab nga mao sila Elmer Mole, hamtung  ang panuigon, ug Margie Mole, hamtung ang panuigon, ug pulos molupyo sa Purok Marang, Barangay Cagangohan, dakbayan sa Panabo.

Sumala sa report gikan sa Comval Province Police Provincial Office nga nahitabo ang aksidente pasado alas 6:30 sa gabii niadtong Martes sakay sa ilang motor ang magpamilyang biktima nga gidrayban sa amahan nga si Elmer padulong sila sa direksyon sa dakbayan sa Tagum sa dihang nahitabo ang aksidente.

Pag-abot sa likoon nga bahin sa nahisgutang dapit, mibangga ang motor nga gisakyan sa mga biktima sa gikasugat nga Isuzo Sportivo nga gidrayban sa usa ka Cyrus Orieles nga molupyo sa Purok 14, Barangay Mainit, lungsod sa Nabunturan.

Tungod sa kusog sa impak nangalagpot ang tulo ka mga biktima human nabalintong ang ilang gisakyang motor.

Pulos nakahiagum og mga pangos ug bun-og sa kalawasan ang tulo ka mga biktima ug daling gipangdala sa Davao Regional Hospital sa dakbayan sa Tagum.

Apan ang 8-anyos nga biktimang si Jemar gideklarang dead on arrival sa mga doktor.

Ang kapulisan sa lungsod sa Mawab mihimo na karon og dugang imbestigasyon sa hitabo.