1 patay, 4 samdan sa bangga

USA ang patay samtang laing upat ang samaron human mibangga ang usa ka motorsiklo sa gikasugat niini nga pampasaheroang bus didto sa Circumferential Road, Barangay La Filipina, dakbayan sa Tagum.

Giila ang namatay nga si Ruben Vincent Perez, samtang ang mga samdam nga pulos sakay sa motor mao sila si Ryan Zamora, Arnel Renobles, Raymond Gementiza ug Ronnel Zamora, mga molupyo sa dapit.

Sumala sa report gikan sa Tagum City Police Station nasayran nga nahitabo ang aksidente pasado ala 1:00 sa kaadlawon niadtong Martes.

Nagdagan ang usa Bachelor bus nga may plakang LWP-378 gikan sa siyudad sa Davao padulong ngadto sa Tandag, Surigao del Sur, gimaneho ni Gerardo Cadusale, ug molupyo sa Matina, dakbayan sa Davao.

Pag-abot sa dapit, mibangga kini sa Honda Wave nga motor nga gisakyan sa mga biktima nga nagbatun sa plaka numero IO-6898.

Tungod sa kusog nga impak nilagpot ang mga biktima resulta sa pagkahiagum nila og mga pangos ug bun-og sa kalawasan.

Daling gipangdala ang mga biktima sa Davao Regional Hospital aron mapatambalan.

Apan si Perez gideklarang dead on arrival.

Sa imbestigasyon sa kapulisan nasayran nga miilog og lugar ang motor hinungdan nga nabanggaan sila sa bus.

Gikataho nga ang mga biktima gikan sa usa ka balay kalingawan sa wa pa nahitabo ang aksidente.

Ang drayber sa bus mitahan sab dayon ngadto sa mga otoridad.

Kapulisan sa siyudad sa Tagum ang mihimo na karon og dugang imbestigasyon sa hitabo. (Marvin Pineda)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph