1 patay sa riot

Friday, March 19, 2010

USA ka ulitawo kinsa nakig-riot sa wala mailhing sakop sa gang ang napusilan patay sa alas 2:00 pasado sa hapon niadtong Huwebes didto sa baybayon sa Barangay 22-C Poblacion, siyudad sa Davao.

Ang biktima giila nga si Jaypee Gomez, 18, nagpuyo sa Rosemarie Street, Barangay Kapitan Tomas Monteverde, distrito sa Agdao, ning siyudad.

Have something to report? Tell us in text, photos or videos.

Sa imbestigasyon ni PO2 Marlon Donquilab sa Sta. Ana Police Station, ang biktima nakig-riot sa wala mailhing mga batan-ong lalaki sa wala pa siya namatay.

Si Paul John Cabrera, usa sa mga nakasaksi, nagbutyag sa kapulisan nga iyang nakita ang biktima nga nagdala og indian pana ug nakigharong sa mga armadong lalaki.

Mga nakasaksi nagbutyag nga wala madugay mipaka ang buto sa armas ug ilang nakita nga natumba ang biktima mao nga gitabang siya.

Si Gomez nakaangkon og samad pinusilan sa iyang walang abaga ug dunay mga bun-og sa iyang kilay hinungdan nga gidala siya didto sa Davao Medical Center (DCM).

Sa paghiabot sa maong tambalanan, mga doktor nga maoy nag-atiman sa biktima nagbutyag nga patay na siya dihang miabot sa hospital.

Samtang gihimo ang follow-up investigation ni Police Senior Inspector Ranulfo Cabañog, hepe sa Sta. Ana Police Station, nasayran nga ang mipusil sa biktima mao sila alyas Tawing Jaca ug Awing Alpis, pulos taga Barangay 22-C Poblacion.

Mga suspetsado gipangita na karon sa kapulisan aron sikopon ug pasakaan og kaso ngadto sa korete gumikan sa pagpusil patay sa biktima.

Namatikdan sa katawhan sa maong lugar nga bisan apil ang improvised hand gun kun 'sumpak' sa gun ban nga gipatuman sa Comelec, apan padayon kining gigamit sa mga batan-on nga nalambigit sa riot ug walay kahadlok nga masikop sila sa mga otoridad.