SAMDAN ang usa ka trabahante sa United Philippine Drilling (UPD) ug nakalingkawas ang ubang mga kauban niini human kalit gibanhigan ang ilang sakyanan sa grupo sa mga bandidong B'laan, didto sa Barangay Kimlawis, Kiblawan, Davao del Sur.

Mga alas 9:30 ang takna sa buntag, Lunes dihang gibanhigan ang sakyanan sa kumpanya sa UPD.

Ang samdan, nailhan nga si Jessie Yanan, 29, minyo ug taga Sitio Bongmal, sa Barangay Kimlawis.

Sakay sila sa usa ka kolor itom nga Toyota Hilux nga nagbaton sa plakang WCF-909.

Matod sa kapulisan, gikan ang mga trabahante sa Sitio Bongmal ug padong ang ilang rota ngadto sa Sagittarius Mines Incorporated (SMI) nga nahimutang sa Sitio Sanyolpalak sa lugar, sa dihang giatngan sa mga bandido.

Kalit nga girapido sa mga bandido ang ilang sakyanan sa UPD nga niresulta sa pagkaigo ni Yanan sa walang bahin sa iyang kamot apan bugtong kini lang ang naigo.

Hinuon, wa na gikataho kung kinsay mga kaubanan sa biktima.

Sa insidente naigo sab sa mga bala ang ibabaw nga bahin sa ilang sakyanan.

Mga pulis nga nitubag sa alerto, niingon nga nigamit ang mga bandido og carbine rifle ug paltik nga shotgun kinsa daling nikagiw padong sa wa matinong lugar human sa pagpamanhig.

Apan, sa gihimong operasyon sa kapulisan, nailhan nila ang suspek nga si alyas Kansing, alyas Danny Otay ug alyas Jember Dayansay, kinsa giingong anaa lang nagpahipi sa bukirong parte sa lugar.

Ang biktima, daling gitambalan sa medical station sa SMI nga nahimutang sab sa dapit.

Nasayran sa Superbalita nga wa mouyon ang mga bandido sa proyekto sa SMI
sa lugar mao nga kanunay kining manghasi gawas nga buot sab kining mangilkil sa maong kumpanya.

Nihimo na og lakang ang kapulisan aron mapakgang ang kalihukan sa maong grupo samtang gitahasan karon si PO3 Allan Dave Parantar sa paghimo og dugang pagpanubay sa insidente. (Dondon Dinoy)