PATAY ang dose ka mga sakop sa Lawless Moro Islamic Liberation Front (MILF) Group ug laing duha ka miyembro sa Citizen Armed Forces Geographical Unit (Cafgu) sa nagpadayon nga engkwentro didto sa Central Mindanao.

Sumala sa taho gikan sa 6th Infantry (Kampilan) Division sa Philippine Army, alas 7:40 sa buntag, Enero 6, gisulod sa mokabat 150 ka mga MILF ang Barangay Sangay, Kalamansig, Sultan Kudarat Province.

Gibutyag ni Col. Julieto Ando nga gipanghasi sa mga rebelde ang mga sibilyan ug gisulong ang kampo sa mga Cafgu ug sundalo sa dapit.

Tungod niini, nagpinusilay ang duha ka mga grupo sud sa taas-taas nga higayon gamit ang ilang mga tag-as nga kalibre sa armas.

Gumikan sa kadaghan sa mga rebelde, miabag na ang duha ka MG-520 Attack Helicopter ug duha ka OB-10 Bronco Bomber Plane gikan sa Philippine Air Force aron abugon ang mga rebelde.

Matud ni Kalamansig Municipal Mayor Rolando Garcia nga nagsugod ang kagubot gumikan sa katag-katag nga pagpangatake sa LMG sa mga Cafgu ug Army Detachments.

Gatusan na ka pamilya ang mibakwet gikan sa mga apektadong barangay tungod sa kahadlok nga maipit sa kagubot.

Matud ni MILF Civil Military Relations Chief Eid Kabalu, buot lang unta nga resolbahon sa ilang grupo ang away sa yuta sa mga pamilyang Muslim ug Kristiyano sa Kalamansig.

Siya nagsulti nga di sila ang nanguna sa kasundaluhan ug mga Cafgu inay sila ang giunhan sa pagpabuto sa mga otoridad mao'ng napugos sila sa pagbalos.

Nagpadala na og dugang puwersa sa militar si 6th ID Chief Major General Raymundo Ferrer aron nga motabang sa paglutos sa mga rebelde nga nag-plano nga sudlon ang Poblacion, Kalamansig. (Edgardo Fuerzas)