14 ka stalls sa palengke, 2 bay ug CVO outpost naugdaw

Sunday, March 21, 2010

NIABOT ug 14 ka mga stalls sa palengke didto sa lungsod sa Sulop, Davao del Sur, duha ka mga balay ug usa ka outpost sa Civilian Volunteers Organization (CVO) ang maayong pagkaabo sa sunog, Sabado sa udto.

Si Chief Inspector Decemoso Remorosa, provincial fire marshall, nagkanayon nga nagsugod pagsilaob ang kalayo mga alas 12:30 ang takna niadtong higayona.

Have something to report? Tell us in text, photos or videos.

Nilutaw sa inisyal nga imbistigasyon sa Bureau of Fire Protection (BFP) nga ang sunog nahitabo gumikan sa usa ka plantsa nga nabiyaang nagkabit sa outlet sa kuryente sa sulod sa usa ka tindahan.

Matod sa BFP, paspas kaayong nikanit ang kalayo ngadto sa silingang mga gambalay mao nga nahitabo nidako ang kalayo.

Hinuon, napalong sa BFP ang kalayo mga ala 1:00 sa hapon tungod sa tabang sa mga bombero gikan sa nagkadaiyang lungsod sa lalawigan.

Nitabang sab pagpakgang sa sunog ang mga sakop sa Filipino-Chinese fire volunteers mao nga wa nagdugay ug napawong dayon sa BFP ang kalayo.

Sa kasamtangan, di pa makahatag og inisyal nga impormasyon ang BFP kun pila ang danyos sa sunog apan dako ang ilang pasalamat nga way kinabuhing nakalas o naangol.

Padayong nagpahimangno ang kabumberohan ngadto sa katawhan nga mag-amping gyud sa ilang mga kabtangan ilabi pa nga El Nino ug init kaayo ang palibot.

Nahitabo ang sunog samtang nagsaulog karong bulana ang BFP sa Fire Prevention Month nga adunay temang "Sustaining Fire Prevention Through Active Community Participation". (Orlando B. Dinoy)