2 ka lalaki nag-duwelo

Monday, February 8, 2010

DUHA ka mga lalaki ang nahidangat sa balay tambalanan human nagdinunggabay, alas 12 sa kaadlawon niadtong Dominggo.

Nasulod karon sa Davao del Sur Provincial Hospital ang mga biktimang sila Roxie Paquit, 30, molupyo sa Purok 5, Barangay New Cebu ug Celestino Areg, 23, taga Barangay Carre, pulos mga ulitawo, ug parehong taga Sulop, Davao del Sur.

Have something to report? Tell us in text, photos or videos.

Si Paquit nahiagum og samad dinunggaban sa kutsilyo sa iyang paa samtang si Arig nasamdan sa dughan.

Ang kapulisan nga nag-imbestiga sa krimen niingon nga ang duha ka mga biktima nagkuyog pa sa pag-inom niadtong higayona.

Apan dihang nangahubog na, kalit lamang sila nga naglalis sa wa pa masutang rason.

Tungod kay miinit na ang diskusyon sa duha, wa nay buot magpalupig kanila, nahitabo ang dinunggabay.

Nasayran nga ang duha pulos armado og kutsilyo atol sa hitabo.

Gisuta pa karon sa kapulisan kun kinsa kanila ang angay kasuhan sanglit nagpabilin pa sila sa bay tambalanan ug nagping-it sa kasakit sa samad. (Dondon Dinoy)