DUHA ka mga tiguwang mananagat ang nalunod human gikuso-kuso sa dagkong balod ang ilang gisakyan nga pumpboat didto sa Dadatan, Talicud, Island Garden City of Samal.

Usa kanila ang namatay samtang ang usa naluwas sa laing mananagat sa alas 7:00 sa buntag niadtong Domingo.

Namatay mao si Eduardo Gaspar, 75, nagpuyo sa Purok Juancho, Barangay 23-C Poblacion samtang ang naluwas mao si Alexander Garcia, 65, nagpuyo sa Isla Verde, Barangay 23-C Poblacion, siyudad sa Davao.

Si PO2 Restie Tan, duty investigator sa Sta. Ana Police Station, nagbutyag sa iyang spot report nga nabangalan ang mga biktima sa mga tawo nga luwan sa M/B Apaljack nga gipangulohan ni Romel Teon.

Si Eddie Gaspar, anak sa namatay, nagbutyag sa kapulisan nga nagkuyog ang iyang amahan ug si Garcia sa pagpanagat nianang Sabado sa gabii apan naabtan sila og dakong unos sa lawod mao nga napikas ang ilang pumpboat.

Giingon nga posibleng wala nakalahutay palangoy ang namatay gumikan sa kakusog mga balod mao nga nalumos siya.

Si Gaspar wala na magginhawa dihang napalgan sa mga mananagat niadtong higayona.

Si Garcia, tungod kay medyo batan-on pa kung itandi sa namatay, nakalahutay paglangoy mao nga naluwas siya gikan sa kamatayon.

Gisulti sa kapulisan nga walay nakita nila nga senyales nga dunay foul play ang kamatayon sa biktima.

Ang patay'ng lawas sa biktima gipahiluna na sa mga kabanay aron ihatud sa iyang katapusang pahulayan. (AD)