PULOS diay pag-umangkon sa kanhi pulis sa lalawigan ang duha ka mga suspek nga gipasanginlang nipatay sa drayber og habal-habal didto sa Barangay Igpit, dakbayan sa Digos, niatong Martes sa gabii.
Sa impormasyong nahagpat gikan sa usa ka tinubdan, giingong pag-umangkon sa mga pulis nga ni-retiro na gikan sa serbisyo ang mga suspek.

Gilantaw sab sa otoridad nga kon nganong nasaag og direksyon ang mga suspek ug kon sakop ba sila sa organisadong grupo sa mga tulisan.

Kahinumdumang gipakyaw og P100.00 ang 24 anyos nga biktimang si Marlon Roble, minyo ug lumolupyo sa Crossing Hagonoy, Davao del Sur sa mga suspek nga nailhang sila si Darwin Sarabillo, 27, minyo nga taga Barangay Dalumay, lungsod sa Magsaysay, Davao del Sur ug nisibat nga si alyas Pong-Pong Ule nga taga Sitio Salmingcong, Barangay Calamagoy, nga molupyo sab sa nahisgutang lungsod.

Gikataho nga gitulis sa mga suspek ang biktima ug giilog ang motor niini. Wala pa natagbaw ang mga suspek, gitigbas pa niya ang biktima sa makadaghang higayon nga miresulta sa iyang kamatayon.

Si Sarabillo lamang ang nadakpan sa kapulisan sa gihimong hot pursuit operation.

Gitataw ni Inspector Charlie Merca nga padayon pa nilang gipangita si Ule kinsa tulin nga niiktad human nabuhat ang krimen.

Ang biktima, giayo paglapa ug pagluba nga niangkon og napulo ka mga samad sa nagkadaiyang parte sa lawas.

Hugot nga gikondena sa pamilyang Roble ang nahitabo sanglit alang sa amahang si Anselmo, gi-ihaw sama sa usa ka baboy ang iyang anak nga pamilyado.

"Di gyud namo mapasaylo ang mga suspek kay grabe ka brutal ang kamatayon sa akong anak kinsa namasahero lang alang sa iyang asawa ug mga anak," matod sa uwahi.

Nitabang na sab sa pagpangita ang kapulisan sa lungsod sa Magsaysay batok sa suspek nga si Ule.

Si Inspector Edito Mandi, hepe sa lugar nikanayon nga pakyas silang makit-an ang suspek sa ilang dapit.

"Pina follow-up ko itong si Ule doon sa kanila kaso two weeks na raw di umuuwi," sa text message nga gipadangat ni Mandi sa Superbalita.

Hustisya maoy gipangayo sa nahibiling pamilya sa biktima mao nga gihagit karon ang otoridad nga madakpan gyud si Ule aron mataral ngadto sa korte. (Dondon Dinoy)