DUHA ka mga tawong nag-atubang og managlahing kaso sa Regional Trial Court Branch 18 sa Davao del Sur, nasikop sa duha ka istasyon sa kapulisan human miguwa ang ilang orden de aresto.

Unang gimando ni Executive Judge Carmelita Sarno-Davin sa RTC Branch 18 ang pagsikop sa 73 anyos nga si Mariano Banuelos, minyo ug taga Purok 7, Barangay Palili, sakop sa lungsod sa Padada Davao del Sur ug Marcelino Hartia Jr., 56, retiradong empleyado kinsa lumolupyo sa Dona Aurora didto sa dakbayan sa Digos.

Subay sa gipagulang mando sa korte, gikataho nga si Banuelos nag-atubang sa criminal case number 277-109 ubos sa kasong qualified theft.

Mga alas 9:30 ang takna sa gabii, Nobyembre 3 dihang nasikop ni Police Officer 3 Rex Ruelo, warrant PNCO sa Padada Police Office, ang akusado didto sa ilang lugar.

Samtang si Hartia, nasikop sab ni SPO3 Renato Pena, warrant PNCO sa Digos City Police Office (DCPO), mga alas 10:30 sa buntag didto sa iyang pinuy-anan.

Matod pa nga tulo ka mga kasong paglapas sa R.A. 9262 kun Violation Againts Women and their Children (VAWCI) ang giatubang sa suspek.

Ang duha ka mga dinakpan, gikostudiya na sa managlahing selda sa kapulisan samtang gihuwat ang sunod nga mando sa korte. (Dondon Dinoy)