2 nabanggaan sa bus, patay

Wednesday, August 4, 2010

DUHA ka tawo ang napatay human nagbangga ang usa ka motorsiklo ug de-pasaherong bus didto sa Zone 7, National Highway, Barangay Villarica, Island Garden City of Samal, Martes sa hapon.

Nailhan ang mga biktima nga mao sila si Warlito Pasco, hamtong ang panuigon, ug si Jun-jun Pasco, ug pulos molupyo sa Super Island Subdivision, Barangay Miranda sa maong siyudad.

Have something to report? Tell us in text, photos or videos.

Sa report gikan sa Davao del Norte Police Provincial Office nasayran nga nahitabo ang aksidente pasado alas 5:30 sa hapon, samtang nagmaneho sa iyang Honda Dream nga motor si Warlito angkas si Jun-jun.

Pag-abot sa Zone 7, mibangga ang motor nga gisakyan sa mga biktima ngadto sa gikasugat nga Island City Express bus nga dunay body number 8834 ug nagbaton sa plaka numero LWS-490 ug gidrayban sa usa ka Eduardo Laput.

Migawas sa inisyal nga imbestigasyon sa kapulisan nga kusog ang dagan sa duha ka mga sakyanan ug pag-abot sa maong dapit, nagbangga sila.

Tungod sa kakusog sa impak, nahiagum og grabing bun-og ug pangos sa kalawasan ang duha ka mga biktima ug gipangdala sila sa ospital.

Apan wa na kalahutay ug gideklarang dead on arrival siya sa mga doktor.

Ang drayber sa bus mitahan sa iyang kaugalingon ngadto sa mga otoridad.

Kapulisan sa siyudad sa Samal mihimo na og dugang imbestigasyon sa hitabo. (Marvin Pineda)