USA ka lalaki ang diha-dihang namatay samtang laing usa ang namatay sa balay tambalanan human nahug ang ACF Bus nga dunay body number 5400 (plate number LVX 883) didto sa Sitio Magasayap, Barangay Poblacion, Malita, Davao del Sur.

Gitataw ni Supt. Victorina Mendez nga ang namatay mao si Arnel Masanog, 29, minyo ug taga-Barangay Poblacion ug ang drayber sa bus nga si Bennie Carcellar nga wala na sab natabang sa Davao Medical Center sa siyudad sa Davao.

Daghan sab ang grabeng nasamdan, 15 tanan, ug gidala sila sa Malita District Hospital ug Davao del Sur Provincial Hospital apan tungod sa kakuwang sa himan ug mga medisina, gidala na lamang sila sa Davao Medical Center.

Mga samdan, nailhan nga sila Antonio Catoc, 52, konduktor sa bus nga taga-Ulas, dakbayan sa Davao; Rosalyn Bacudo, 24, taga Matalam, North Cotabato; Maricel, 21, ug Rosela Saraña, 41; Boy Garcia, 40; Joy Lareño, 30; Lydia Bacaro, 62; Joy, 34, Janine Nicole Silvano, 5; Senon Sucatan, 49; ug Edith Doria, nga pulos mga taga-Malita.

Ang bus, mibiyahe mga alas 7:00 sa gabii gikan sa siyudad sa Davao paingon sa Poblacion sa Malita ug pila ka kilometro na lamang ang gilay-on niini sa ilang destinasyon dihang nahitabo ang mangilngig nga aksidente.

Suwerteng napangos ug nabun-og lang ang ubang mga biktima nga sila Danilo Sagcaan, 37, Philip, 57, ug 8 anyos nga anak niining si Baby Jean Guia, ug molupyo sab sa Malita.

Si Sagcaan nagtug-an nga daan na diay'ng namatikdan nga dunay deperensiya ang bus, ug gani nihunong pa kini sa wa pa nahitabo ang insidente.

"Giingnan niya (drayber) ang konduktor nga mangita og kalso mao to nikanaog pud gani ko kay nitabang pagpangita, unya natingala ko nilarga na man sab dayon nidagan ko pagsakay og balik duha mi sa konduktor," ang nangurog nga pung niini sud sa ospital.

"Uwahi nakong namatikdan nilupad na mi, unya nisangpit ko sa Gino-o, siya gyud ang nagluwas nako kay nawad-an naman ko og paminsar abi gani nako patay nako, salamat na lang kay ikaduha nako ning kinabuhi," niya pa.

"Nihugot gyud ko pagunit sa bangko unya ang ubang mga pasahero ngari tugpa sa akong ulo, murag kapila gyud mi nabalintong gikan sa ibabaw kay katong usa ka babaye nakit-an nako niadto sa atop unya nganha na pud sa salog," dugang ni Sagcaan.

Samtang si Guia, nitataw nga iya na lamang nahinumduman nga gigakos niya ang iyang anak unya nangayo og tabang sa kahitas-an.

"Abi nako patay na mi kay kapila man gyud mi naligid. Pag-abot namo sa ubos naningkamot mi sa akong makagawas sa akong anak kay nabaliktad na man ang bus," niya.

Si Dina, kinsa asawa sa namatay nga si Arnel, nahingawa kaayo sa gidangatan sa iyang bana sanglit nipauli lang kini sa lugar human nag-leave sa bakery nga gi-trabahoan didto sa siyudad sa Digos tungod kay birthday sa asawa.

Ang nagbakho nga si Dina, didto sa Funeraria Novis, nitataw nga nasayran niya gikan sa text sa kauban sa iyang bana nga nakalakaw na kini ug nagdala pa og cake isip pasalubong sa iyang adlaw nga natawhan.

"Kung kabalo pa lang ko nga ikamatay niya ang akong birthday di na lang unta ni saulogon," niya nga gahilak. "Unsaon na lang nako pagbuhi ang 3 anyos namo nga anak, namaligya ra ko isda sa merkado?"

Gipasalig ni Mayor Benjamin Bautista nga motabang ang munisipyo sa mga galastuson ug gikinahanglang tambal sa mga pasyente.

Matod ni Bautista nga iya nang gimando ang paghimo sa makuting imbestigasyon aron mahibaw-an kung nganong nahitabo ang disgrasya.

Sa pikas bahin, gisuta sab sa kapulisan ang posibilidad nga may missing sa maong aksidente tungod sa uwahing ihap sa terminal sa Sta. Maria, Davao del Sur, 22 ang sakay nga pasahero sa bus. (Orlando B. Dinoy)