GRABE ang kahimtang sa duha ka mag-uuma human gipamusil didto sa probinsiya sa Cotabato. Ang kapulisan nag-ila sa mga biktima nga sila Jimmy Espirito, 43 anyos ug Lendo Lipatan, ug mga molupyo sa barangay Poblacion, Carmen.

Base sa impormasyon gikan sa Cotabato Police Provincial Office nga banda 1:40 sa hapon, Nobyembre 3, nanabon ang mga biktima sa barangay Lilungan dihang kalit lamang sila gipamusil sa tulo ka wala mailhing suspek gamit ang kalibre .45 nga pistola.

Bisan sila samdan apan nakahimo pa sa pagdagan paingon sa luwas nga dapit ug nangayog pakitabang sa mga barangay opisyal nga maoy midala nila ngadto sa Cotabato Provincial Hospital sa siyudad sa Kidapawan.

Mga mamumuno dali nga misibat paingon sa wala matino nga direksyon.

Si kanhing Carmen Municipal Mayor Roger Talinio nagkompirma nga una gipamusil ang mga biktima duna sila'y naka-away  nga grupo sa mga sabungero nga ilang gipaguhan sa sabong sa manok sa naasoy nga lugar.

Gimando na ni Cotabato Police Provincial Director S/Supt Norberto Batislaong ngadto sa Carmen PNP, ang hugtanon nga imbestigasyon sa pagpamusil sa mga biktima aron masuta ang tinuod nga motibo ug madakpan ang mga suspetsado.(Edgardo Fuerzas)