DUHA ka mga gidudahang tulisan nga nagalihok sa dakbayan sa Davao ug lalawigan sa Davao del Norte ang nasikop sa mga sakop sa Panabo City Police Station didto sa Barangay Gredu, dakbayan sa Panabo, Martes sa kaadlawon.

Mga dinakpan nailhan nga mao sila Jonhiefe Melecio, 26, usa ka driver ug molupyo sa North San Juan, Jerome, Agdao, dakbayan sa Davao; ug si Edwin Barraches, 31, usa ka sekyu, ug molupyo sa lungsod sa Kabacan, North Cotabato.

Sumala sa report gikan sa Panabo City Police Station nga miresponde ang mga sakop sa intel section sa Panabo CPS human madawat ang taho labot sa presensya sa duha ka mga suspek sa nahisgutang dapit.

Ang duha giingong natiktikan nga namaligya sa mga kinawat nga motor.

Gilayong milihok ang mga otoridad ug nasikop ang mga suspek.

Nasakmit gikan sa mga dinakpan mao ang usa ka kalibre .45 nga pistola nga dunay serial number 583825 lakip ang walo ka mga buhing bala, ug usa ka skeleton nga motor nga gidudahang gikarnap.

Mga suspek maoy gituohang nagpaluyo sa sagunson nga mga tulis sa siyudad sa Davao ug sa lalawigan sa Davao del Norte.

Ang duha ka mga suspek gitanggong sulod sa selda samtang gihikay na ang kasong ipasaka batok kaniya.(Marvin Pineda)