20 anyos nga babaye nasikop sa Last 2

Tuesday, February 9, 2010

BABAYE'NG nasakpan nga nagpataya sa duwang Last 2 ang nasikpaw sa mga sakop sa Matanao Police Office human naaktuhan mga alas 5:45 sa hapon, Pebrero 7.
Dinakpan giila nga si Kathleen (apilyedo gitago) dalaga ug taga Luna Extension, siyudad sa Digos.

Matud ni Inspector Milgrace Driz, hepe sa kapulisan, nga ang dinakpan ilang naagian samtang didto kini sa Km. 71, Barangay Sinawilan sa lugar.

Have something to report? Tell us in text, photos or videos.

Ni Driz, nakuha sa posisyon niini ang mga Last 2 paraphernalias apan daw sa mao pa ang pagsugod niini og pataya sanglit kantidad P20 lang ang salapi nga nakuha sa iyang posisyon.

Bisan pa man niini, gikustudiya na sa kapulisan ang dinakpan aron pasakaan og kasong paglapas sa illegal gambling.

Gihimo sa Davao del Sur Provincial Police Office ang mando nga tinud-on sa tanang lungsod ang pagpaundang sa maong sugal.

Gipasigarbo sa ubang hepe sa lalawigan nga napitol na gyud nila ang maong duwa sa ilang tagsa ka mga lugar.

Apan nakaabot sa Superbalita ang impormasyon nga didto sa lungsod sa Bansalan, Davao del Sur hinay-hinay na nga namalik ang mga anaa sa pronton ug ang kapulisan lang maoy ilang gilipat.

Sayo niini, gikasuko sa usa ka dakong opisyal sa lalawigan sa Davao del Sur ang paghitak sa maong duwa. (Dondon Dinoy)