USA ka 21 anyos nga maguuma gitigbas sa iyang gikabikil nga silingan didto sa lungsod sa Malita, del Sur niadtong Nobyembre 3.

Nakalingkawas hinuon ang biktima gikan sa hinanaling kamatayon kay nadali paghatod didto sa Malita District Hospital apan gibalhin sa laing ospital nunot sa delikadong kahimtang.

Biktima, giila sa Malita Police Office nga mao si Oliver Masayao, 21, minyo ug lumolupyo sa Sitio Atbangan, Barangay Kidalapong, sa maong dapit.

Si Supt. Victorina Mendez, hepe sa kapulisan, niila sa suspek nga mao si Enrico Santan, hamtong ug silingan ra sa biktima.

Ang kapulisan sa Malita nga niresponde naghulagway nga nahiagom ang biktima og mga samad tinigbasan sa nagkadaiyang parte sa lawas wa pay labot ang samad sa ibabaw nga bahin sa iyang baba sa krimen nga nahitabo mga alas 10 sa gabii niadtong higayona.

Mga doktor nga nagtabang sa biktima nidali pag-rekomenda nga ihatod kini didto sa Davao del Sur provincial hospital.

Apan, sa impormasyong nadawat sa Sun. Star Superbalita, gitataw nga atua na kini sa Davao Medical Center.

Niangkon hinuon ang kapulisan nga wa pa sila masayod kung unsay motibo sa krimen kun nganong nagkabikil ang suspek ug biktima.

Wa pa nasikop sa kapulisan ang suspek.(Orlando B. Dinoy)