TUNGOD sa lawasnong panginahanglan, pugsanong gipahungaw sa amahan ang kainit sa iyang gibati ngadto sa kaugalingong anak.

Apan ang maong linuog nga hitabo nadiskobrehan niadtong Huwebes.

Tingkagol na sa bilanggoan niadtong Biyernes ang suspek human gipasakahan og kaso sa inahan sa 3 anyos nga batang babaye sa dihang nahibaw-an nga gipahimuslan ang bata nga gitago lang sa ngalan nga usa ka Nene (dili tinuod nga ngalan kay menor de edad).

Boluntaryong mikuyog sa kapulisan sa Digos City Police Office ang 23 anyos nga laborer nga si Alex (apilyedo gipugngan alang sa dungog sa anak) human giangkon niining nahimo niya ang linuog nga buhat.

Gisaysay sa suspek nga milakaw niadtong higayona ang iyang asawa ug naatol sab nga nakatulog ang tulo ka tuig nga biktima.

Gidali pagbira sa suspek ang bata padung sa pikas lawak sa magtiayon ug didto gisugdan niini pagtagbaw ang iyang kaugalingon.

Nakalimot ang suspek nga kaugalingong dugo niya ang naglatay sa biktima ug gipanamastamasan kini.

Napusgay ang kaulay sa bata ug nadiskobrehan na lamang sa inahan sa dihang namatikdan ang nagkadugo nga panty sa makaloluoy'ng bata ug nagping-it na sa kasakit.

Apan ang suspek nagbasol sa iyang nahimo ngadto sa bata.

"Mangayo lang ko og pasaylo nila sa akong nahimo," sulti sa suspek nga amahan.

Mas misamot kasakit ang gibati sa inahan sa bata human nasayran niya gikan sa naghiling nga mga doktor nga na-impeksyon diay ang kinatawo sa iyang anak ug gituhoang nagkasakit kini og Sexually Transmitted Disease (STD).

Dili mapasaylo sa pamilya ang gibuhat sa suspek hinungdan nga hingpit na nila kining gipabalhog sa bilanggoan human giduso ang kaso.

Hugot nga nagpahimangno karon ang buhatan sa Municipal of Social Welfare and Development Office nga ampingan gyud sa mga ginikanan ang ilang mga anak nga babaye ilabi na sa mga menor de edad.

Matud pa sa maong buhatan nga dili isalig nga ibilin lang sa ilang balay ang bata nga nag-inusara.

Sagad mahitabo ang susamang krimen sa mga mingaw nga lugar ilabi na kung way laing nakakita ug hubog ang suspek.(Orlando B. Dinoy)