3 ka fetus, usa gitangag og iring, napalgan

Tuesday, September 7, 2010

USA ka bata nga bag-ong nahimugso ang gibilin sa wa mailhing inahan nga gisud og karton kagahapon sa kaadlawon didto sa Bangkal, samtang laing duha ka mga "fetus" ang gilabay sa wa mailhing inahan didto sa Barangay Lapu-lapu, Agdao, siyudad sa Davao niadtong Lunes.

Si SPO2 Reynaldo Gustilo, imbestigador sa Talomo Police Station, nagbutyag sa iyang spot report nga ang bata napalgan sa alas 4:30 sa kaadlawon duol sa balay ni Placido Patriana didto sa Phase 3, Kadayawan Homes, Bangkal.

Have something to report? Tell us in text, photos or videos.

Post your reaction to the Manila hostage crisis

Matud ni Gustilo nga gitawgan sila sa security guard sa Davao Adventist Hospital ug nagpahibalo nga dunay bata nga biniyaan sa inahan nga gidala sa maong tambalanan.

Human masayud sa maong impormasyon, suma ni Gustilo, miadto sila sa maong hospital ug didto nila nasayran nga ang bata nasiplatan sa usa ka tricycle driver.

Ang driver maoy nagpahibalo kang Patriana nga dunay bata nga gisulod og karton nga bag-o pang natawo sanglit wa pa maputol ang pusod.

Tungod sa maong kasayuran, miguwa si Patriana sa ilang balay ug gidala ang bata sa iyang asawa nga si Josephine Patriana.

Si Josephine na ang nagdala sa hospital aron katambalan ang bata sanglit dunay mga pinaakan sa lamok ug hulmigas human siya gibilin sa maong lugar.

Sa laing bahin, naukay sab ang mga molupyo sa Purok ICC, Barangay Lapu-lapu dihang ilang nadiskubrehan nga dunay gilabay nga "fetus" sa alas 3:00 sa hapon niadtong Lunes.

Si Aniza Cabanlet nagbutyag sa kapulisan sa Sta. Ana Police Station nga ang "fetus" gitangag sa ilang iring ug gitagoan sa ilang cabinet.

Ang nakadiskubre sa maong "fetus" mao ang iyang anak nga nag-ilis sa iyang kwarto gikan sa eskwelahan.

Ang bata nagbutyag sa iyang inahan nga dunay tinai sa isda nga gitangag sa ilang iring mao nga iyang gisusi apan nasuta nga usa ka "fetus" nga gikan gipakuha sa taguangkan sa inahan.

Si John Villegas, 15, nagpahibalo sab sa iyang apuhan nga duna siya'y nakit-an nga "fetus" duol sa ilang balay mao nga gisusi sab sa kapulisan.

Gituohan nga kaluha ang nakaplagan nga "fetus" sanglit managsama ang ilang gidak-on ug lugar nga gilabayan.

Samtang gipahiluna sa kapulisan ang duha ka mga "fetus" sa Angel Funeral Homes, naniid sab sila karon aron mailhan ang mga inahan nga naghimo og di maayo ngadto sa ilang mga anak. (AD)