TULO ka mga sundalo nangaangol human nahulog sa tulay ang ilang gisakyan nga Semba tank sa probinsiya sa Maguindanao.

Sigun sa taho gikan sa 6th Infantry Division sa Philippine Army nga banda alas 2:20 sa hapon, Hulyo 2, mitabok na sa tulay sa barangay Poblacion, Buluan ang armored personnel carrier sa 75th Infantry Battalion sa Philippine Army nga kabahin sa road security nga gihimo sa militar. Apan ang Semba gibanggaan sa usa ka ten-wheeler cargo truck hinungdan nga nahulog sa sapa nga maoy hinungdan sa pagkaangol sa mga sundalo.

Apan gipahayag ni Buluan Municipal Mayor Ibrahim Mangundadatu nga ang Semba tank kauban sa convoy ni Maguindanao Acting Governor Datu Sajied Ampatuan paingon sa siyudad sa Davao gikan sa Maguindanao.

Padung na sa pagpauli ang mga sundalo sa ilang kampo ug kusog kaayo ang dagan niini ug mibangga kilid sa usa ka cargo truck mao nga nahulog sa tulay.

Matud ni Habito Penario, drayber sa truck, nga sa layo pa iya na nga nakit-an ang Semba nga nag-ikis-ikis ang dagan ug mora'g nawad-an og preno hinungdan nga nagpa-daplin siya sa kalsada duol sa tulay.

Apan mibangga gihapon kini kilid sa iyang gimaneho nga truck ug diritso nga nahulog sa tulay.

Dali nga gisapupo sa ilang mga kaubanan nga sundalo ang mga biktima ug gidala sa Camp Siongco Hospital ug luwas na sa makuyaw nga kahimtang.

Ang kapulisan sa Buluan padayong nag-imbestiga aron masuta kon si kinsa ang sad-an sa naasoy nga aksidente.