TUNGOD sa dili tiaw nga suliran mahitungod sa gugma, tulo ka mga lalaki ang nakahukom nga magpakamatay aron dili nila antuson sa dugay nga panahon ang kasakit sa ilang dughan. Mga biktima napalgan sa ilang kabanay sa tulo ka mga managlahing lugar dinhi sa siyudad sa Davao.

Unang nagpakamatay mao si Marco Gabone, 16, out-of-school youth, nagpuyo sa Saint Jude, Vector Homes Subdivision, Barangay Communal, distrito sa Buhangin.

Si Gabone napalgan sa alas 5:00 sa hapon niadtong Martes ibabaw sa ilang kisame nga nagbitay ug hapit na madugta ang iyang patay'ng lawas.

Ang biktima giingon nga upat na ka adlaw nga nahanaw sa ilang balay ug nagtuo ang iyang mga kabanay nga milakaw siya ngadto sa wala masayri nga lugar.

Ang patayng lawas sa biktima nadiskubrehan human natimahoan sa iyang igsuong babaye nga dunay bahong patay sulod sa ilang balay.

Mga ginikan sa biktima mibasol sa hinigugma sa namatay sanglit siya ang hinungdan nganong nagpakamatay ang ilang pinalangga nga anak.

Alas 2:00 sa kaadlawon kagahapon, nadiskubrehan sab nga naghikog si Roel (bansagon gitago tungod sa hangyo sa mga higala), nagpuyo sa Purok 2, Barangay 76-A Bucana.

Si Roel nagbitay sulod sa ilang balay gamit ang usa ka pisi mao nga gidala siya didto sa Davao Medical Center (DMC) apan gideklara nga patay na siya.

Mga higala sa biktima nagbutyag sa mga gwardiya sa DMC nga nagpakamatay ang ilang higala sanglit dili na maantos ang suliran niya uban sa usa ka babaye nga iyang gikapuyo.

Samtang alas 8:00 sa buntag kagahapon, nasiplatan sab nga nagbitay sa punoan sa kahoy nga talisay si Henry (bansagon gitago sa Superbalita), 48, ulitawo, nagpuyo sa Gaisano Compound, Diversion Road, Barangay Cabantian, distrito sa Buhangin.

Si Henry nasiplatan sa iyang igsuong babaye nga misiga ang mga matay samtang nagbitay sa kahoy mga 100 ka metros ang gilay-on gikan sa ilang balay.

Giingon nga sa wala magpakamatay ang biktima daw naliso ang maayong pangisip niini mao nga nahimo niya ang pagpakamatay.

Mga patay'ng lawas sa biktima gipahiluna na sa ilang mga kabanay sa lokal nga punerarya dinhi sa siyudad. (AD)