TULO ka mga batan-ong lalaki ang gipamusil sa usa sa upat ka mga lalaki nga nag-atang kanila padulong pauli gikan sa disco party sa Luzville Subdivision, Barangay Panacan, Davao niadtong Sabado.

Mga biktima mao sila Alfredo Celebrano, 22, nagpuyo sa Vista Verde, Barangay Sasa; Edwin ug Gigi (mga bansagon gipugngan kay pulos menor), pulos nagpuyo sa Orchids Street, Barangay Buhangin Proper.

Base sa imbestigasyon ni SPO1 Rico Digamon sa Sasa Police Station, mga biktima giingon nga mopauli na unta sa ala 1:00 sa kaadlawon apan imbes makapahulay sa ilang balay tambalanan ang ilang gidangatan.

Si Digamon nagbutyag sa iyang spot report nga naglakaw ang mga biktima sa basketball court sa Luzville Subdivision apan giatangan sila sa upat ka wala mailhing mga batan-ong lalaki.

Suma sa mga nakasaksi nga atol sa panag-abot sa mga biktima ug sa mga batan-on, usa ka lalaki ang miibot og wala matino nga kalibre sa armas dayon gipamusil ang mga biktima.

Si Celebrano naigo sa iyang walang tuhod, si Edwin naigo sa iyang tuong tuhod ug naigo sab ang mga tiil ni Gigi mao nga gitabang sila sa mga paramedics sa Central 911.

Human nadapatan og pasiunang pagtambal sa mga paramedics, mga biktima daling gidala didto sa Davao Medical Center (DMC).

Mga mga batan-on lakip ang namusil sa mga biktima daling mibiya sa nahitaboan sa krimen aron dili sila masikop sa morespondeng mga pulis.

Gituhoan nga nagbikil ang mga batan-on sa mga biktima mao nga nahitabo ang krimen, apan gisusi pa kini sa kapulisan aron sayron ang tinuod nga hinungdan sa maong pagpamusil. (AD)