TULO ang patay human gidaro sa usa Isuzu Forward nga trak de karga ang usa ka purlon nga naghatud og minatay didto sa Sto. Tomas-Panabo Road, Malahay Highway, Barangay A.O. Floirendo dakbayan sa Panabo, Dominggo sa hapon.

Mga napatay mao sila Judy Batiquang, drayber sa purlon, Felisa Zafra ug si Anecita Alonzon.

Sumala pa ni P/Supt. Alexander Serano, hepe sa Panabo City Police Station, nga nahitabo ang aksidente pasado alas 3:00 sa hapon didto sa nahisgutang dapit.

Sakay ang tulo ka mga biktima sa usa ka purlon nga mihatud ug minatay sa dihang nadaro kini sa usa ka Isuzo Forward nga trak de karga nga gidrayban ni Louie Inting.

Giingong wa nabantayan sa driver sa trak de karga ang purlon nga mitabok sa dalan tungod sa kakusog sa iyang dagan hinungdan nga nabanggaan kini.

Tungod sa impak nawingig gayod ang purlon resulta sa pagkahiagum og mga pangos ug bun-og sa kalawasan sa mga biktima.

Gisuwayan pa og dala sa ospital ang mga biktima apan wa na kalahutay ug nangamatay pag-abot sa ospital.

Ang minatay nga ihatud unta sa iyang lubanganan nilagpot gayod sa iyang gihigdaang lungon.

Gawas sa tulo ka mga biktima, wa nay gikatahong laing angol sa hitabo.
Ang tulo ka mga biktima pulos mga kabanay sa minatay nga ihatud unta sa sementeryo.

Gikustodiya na sab karon sa kapulisan ang driver sa trak de karga lakip ang iyang gidraybang sakyanan nga nalambigit sa aksidente.

Kapulisan sa siyudad sa Panabo mihimo na karon og dugang pakisusi sa hitabo. (Marvin Pineda)