3 nasamdan sa pagbusikad sa Granada

Friday, March 19, 2010

TULO ka mga tawo ang grabeng nasamdan sa granada nga mibusikad sa probinsiya sa Maguindanao.

Ang kapulisan nag-ila sa mga biktima nga sila si Enrico Ampatuan, Norjata Abdulraman ug Monera Camsa, pulos mga molupyo sa Barangay Poblacion, Sharif Aquak.

Have something to report? Tell us in text, photos or videos.

Sumala sa nahagpat nga taho gikan sa Maguindanao Police Provincial Office, nga banda alas 6:45 sa gabii, Marso 18, duha ka wala mailhing suspek sakay sa usa ka XRM nga motorsiklo, miitsa og granada sa pinuy-anan ni Baimona Ampatuan, Principal sa Sharif Aquak National High School, hinungdan sa pagka-angol sa mga biktima nga naigo sa mga mituwasik nga mga shrapnel sa explosibo.

Dali sab nga misibat ang mga suspek paingon sa wala matino nga direksyon.

Gisuwayan pa sa paglutos sa mga otoridad sila apan wa na maabti.

Matud ni Maguindanao Police Provincial Director Alex Linesses nga sa wa pa gilabay og granada ang bay ni Ampatuan, dunay mga armadong grupo ang nangayo og revolutionary tax sa tulunghaan.

Ang pagbalibad sa principal sa hangyo maoy gituohang nakapasuko sa mga armado mao nga ang gipahimungtan mao ang bay ni Ampatuan.

Gidugang ni Linesses, nga dunay mga suspek na silang gisundan nga padayong nilang gipangita nga konektado sa dakong rebeldeng grupo sa Maguindanao. (Edgardo Fuerzas)