3 patay, 2 angol sa sampok sa sakyanan

Monday, February 8, 2010

TULO ang patay, duha ang angol human nagkarambola ang tulo ka mga single motor didto sa Barangay del Pilar, lungsod sa Mabini, Comval Province, Dominggo sa hapon.

Giila ang mga namatay nga biktima nga sila Neil Gonzada, Arnold Sabacajan ug Edris Adaman, pulos hamtong ang pangidaron, ug molupyo sab sa lugar.

Have something to report? Tell us in text, photos or videos.

Samtang ang duha ka mga samaron sa laing bahin padayon pa nga giila sa mga otoridad.

Sa report gikan sa Mabini Municipal Police Station nasayran nga nahitabo ang aksidente pasado alas 4:00 sa hapon didto sa nahisgutang dapit.

Sa inisyal nga taho, nasayran nga ang duha ka mga motor nga gisakyan sa mga biktimang namatay ang naglawig sa dalan gikan sa Poblacion sa lungsod sa Mabini padulong sa  barangay.

Apan ang usa sa duha ka nagsunog nga motor ang mi-overtake hinungdan nga mibangga sa gikasugat nga laing motor nga gisakyan sab sa duha ka mga samaron nga biktima.

Human nagbangga ang nagsugat nga motor, mibangga sab ang nagsunod nga motor hinungdan nga nagkarambola kini.

Mga sakay pulos nahiagum og samad, pangos sa kalawasan nga miresulta sa kamatayon sa tulo.

Ang duha ka mga samaron padayong giatiman sa mga doktor.

Kapulisan sa lungsod sa Mabini mihimo na karon og dugang pakisusi sa aksidente. (Marvin Pineda)