ASAWA sa abogado patay, lakip ang duha ka kauban sa dihang girakrakan ang ilang gisakyan sa duha ka suspetsadong nagsakay sa motorsiklo kagahapon sa alas 3:25 sa hapon sa Eskina Kimba - South Road Property (SRP) Road, Barangay Cansujong, dakbayan sa Talisay.
Si Virginia Sesbrenio, 65, asawa ni Atty. Raul Sesbrenio, taga Sitio Pungsud, Barangay Lawaan lll, dakbayan sa Talisay ang dead-on-arrival (DOA) nga nadangat sa Talisay District Hospital.
Patay sab ang iyang kauban nga sila si Marlon Joshua Young, ulitawo, gibanabanang 30 anyos, taga dakbayan sa Lapu-Lapu, ug Solidad Enpanto, 50 minyo taga Pungosd, Lawaan lll, Talisay kinsa caretaker sa pamilyang Sesbrenio.
Si SPO1 Mikie Espina, imbestigador sa Talisay City Police, mitug-an sa Sun.Star Superbalita, nga ang mga biktima wa nay kinabuhi sa paghiabot sa Talisay District Hospital.
Ang ilang gisakyan natusaktusak sa mga bala sa kalibre .45 ug ang mga biktima nakaangkon usab og daghang samad sa ilang kalawasan.
Matod pa nga gikan sa dakbayan sa Talisay ug paingon na unta sa dakbayan sa Sugbu sakay sa Isuzu demax YHT-517 ang tulo.
Apan dihang nihunong sila sa may traffic lights sa nahisgutang dapit, duha ka mga suspetsado nga nagsakay sa kolor puwa nga motorsiklo nga may plaka nga for registration mipaduol sa passenger side sa sakyanan.
Wa mag-usik og panahon, kalit silang gipauwanag mga bala sa angkas niini nga giingong niwangon, ingon man pinasagpa ang buhok nga pulos wala magtaptap sa ilang mga nawong nga dali kaayong nisibat subay sa SRP paingon sa dakbayan sa Sugbu.
Gituohan niini nga gun-for-hire ang mga suspetsado tungod kay plansado kaayo ang ilang paghimo sa krimen, diin paspas usab kaayo ang pagbuhat sa ingon.
Didto sa crime scene nakuha ang unom ka kabhang sa kalibre .45 ingon man usa ka deformed slug.
Duha ngadto sa tulo ka mga testigos karon ang ilang gikuhaag pamahayag nga maoy nakakuta sa krimen.
Gituohan nga panagbangi sa yuta diha sa Barangay Lawaan ll dakbayan sa Talisay ug mao karoy gisubay sa imbestigasyon sa mga kapulisan.
Si SPO1 Espina, miingon nga si Atty. Raul Sesbrenio, mibutyag nga daghan na siyang death treat nga nadawat sa iyang kinabuhi tungod sa yuta nga gipang-iya niini sa Lawaan ll.
Sa records sa Talisay Police, sa miaging tuig makadaghang higayon nakapa-blotter si Atty. Sesbrenio tungod sa mga hulga sa kinabuhi niini pinaagi sa text messages.
Hinuon nasuta usab nga adunay mga residente nga naapektuhan sa land dispute ang nagpa-blotter batok sa mga Sesbrenio kinsa gialegahan sa pagpangharas.
Niadtong Lunes ug kagahapong adlawa nagpadayon ang demolition sa mga panimalay diha sa Lawaan II nga gipang-iya sa pamilyang Sesbrenio.
Gipadayag niini nga walay laing gidudahan ang abogado nga nagtinguha sa ilang kinabuhi kon dili ang ilang gikabangi sa yuta.
Nakakuha na hinuon silag mga pangalan sa mga posibling suspetsado sa krimen nga gihatag ni Atty. Sesbrenio, apan sa pagkakaron dili lang una nila ikabutyag sanglit nagpadayon ang ilang imbestigasyon.