32 anyos gipusil didto sa Lanang

Sunday, March 14, 2010

USA ka tawo na sab ang gipusil patay samtang hugot nga gipatuman ang Comelec gun ban dinhi sa siyudud sa Davao niadtong Sabado.

Ang insidente nahitabo sa alas 10:45 sa gabii didto sa Salambat Seafoods Grills and Restaurant, Lanang, siyudad sa Davao.

Have something to report? Tell us in text, photos or videos.

Si Senior Police Officer 2 Henry Balbiran, duty investigator sa Sasa Police Station, nag-ila sa biktima nga mao si Sair Musa, 32, minyo, walay trabaho, nagpuyo sa Kilometro 11, Barangay Sasa.

Matud ni Balbiran sa iyang spot report nga naglakaw ang biktima kauban ang iyang higala nga si Moen Dawani padulong sa Salambat apan kalit silang giatangan sa duha ka wala mailhing mga mamumuno.

Mga nakasaksi sa hitabo nagsulti nga usa ka tawo ang nagbit-bit og .45 kalibre nga pistola ang mipusil sa biktima sa makadaghan nga higayon.

Ang biktima naigo sa iyang ulo ug ubang parte sa lawas nga miresulta iyang kamatayon samtang ang mumuno daling mibiya gikan sa crime scene sakay sa usa ka motorsiklo nga walay plate number.

Si Police Officer 3 Sherwin Balmores sa Scene of the Crime Operatives (Soco) mideklara nga patay na ang biktima sa ilang paghiabot mao nga gidala ang iyang patay'ng lawas sa Angel Funeral Homes.

Nakuha sa mga sakop sa Soco ang lima ka basiyo sa bala sa .45 kalibre nga pistola nga maoy gigamit sa pagpusil sa biktima.

Sa pagsuwat ning balita, gisusi na sa kapulisan ang motibo sa krimen aron mailhan ang mga mamumuno ug masikop sa labing daling panahon. (AD)