37 anyos giihaw sama sa baboy

Monday, February 8, 2010

USA ka 37-anyos nga lalaki gimatada sa suspek sama sa baboy. Ang biktima nahiagom og duha ka mga samad ginulgulan sa liog ug siyam ka mga samad-dinuggaban sa nagkadaiyang bahin sa lawas.

Nahitabo ang mangilngig nga krimen didto sa lungsod sa Kiblawan, Davao del Sur.

Have something to report? Tell us in text, photos or videos.

Nagkaguliyang ang katawhan human nadiskubrehan ang patay'ng lawas ni Tranquilino Catipay, ulitawo ug molupyo sa Barangay Tibongbong, sakop sa silingang lungsod sa Matanao, Davao del Sur.

Ang kapulisan sa Kiblawan nagkanayon nga nakadawat sila sa alarma pinaagi sa text message ni Barangay Kapitan Segundo Salinas, sa Barangay Manual sa maong lugar.

Nailhan ra sab dayon sa kapulisan ang suspek nga mao si Roldan Villafuerte alyas Dansoy kinsa taga Barangay San Isidro sa maong lugar.

Sumala sa mga saksi nga uwahing nagkuyog ug nag-inom pa ang biktima ug ang suspek sa wa pa mahitabo ang krimen.

Nanaghap si Police Officer 3 Allan Dave Parantar kinsa maoy naghupot sa imbestigasyon nga nagkabikil ang duha tungod sa tumang kahubog nga miresulta sa pagbanaw sa dugo.

Apan naningkamot pa ang kapulisan nga masikpaw ang suspek kinsa wa na igkita sa lugar human sa panghitabo.

Giduso dayon sa mga otoridad ang kaso ngadto sa buhatan sa piskalya aron masikop ang suspek sa higayon nga mogawas na ang orden de aresto. (Orlando Dinoy)