UPAT ka mga armadong lalaki kinsa gisuspetsahang tigpayuhot og marijuana ang nasikop sa mga sakop sa Intelligence Section sa Davao del Norte Police Provincial Office, Philippine Drug Enforcement Agency, 1108th Police Provincial Mobile Group, ug Panabo City Police Station didto sa Barangay Cagangohan, dakbayan sa Panabo niadtong Biyernes sa buntag.

Mga dinakpan mao sila Macver Maug, 29; Jayson Maug, 20; Gary Gualberto, 33; ug Arnel Calvalio, 44, pulos molupyo sa Barangay Cagangohan.

Nasayran nga nasikop sa mga otoridad ang mga suspetsado pinaagi sa gahum sa search warrant nga gipaguwa ni Judge Danilo Belo sa Regional Trial Court sa dakbayan sa Tagum.

Mga otoridad mironda sa giingong safehouse sa mga suspetsado nga miresulta sa ilang pagkasikop.

Naaktuhan sa mga otoridad ang mga suspetsado sud sa ilang safehouse nga gihuptan ang ilang mga armas ug ginadiling druga.

Nasakmit gikan kang Macver ug Jayson ang pinaugang dahon sa marijuana nga giputos og papel, pouch nga dunay stick sa marijuana, upat ka alcoy, pinutos nga liso sa marijuana ug usa ka .357 Smith and Wesson caliber pistol nga dunay lima ka mga buhing bala.

Samtang nasakmit sab gikan kang Gualberto ang 14 ka pakiteng pinaugang dahon sa marijuana, timbangan, cellphone, kuwarta nga P870.00, ug usa ka .22 kalibre nga armas nga dunay tulo ka mga buhing bala.

Nasakmit sab kang Calvario ang usa ka kalibre .380 nga pistola nga dunay walo ka buhing bala, usa ka .22 caliber rifle, usa ka smoke grenade, ug usa ka magazine sa M16 rifle nga puno og bala.

Mga suspetsado wa na nakahimo pagsukol dihang giaresto sanglit kalit ang pag-abot sa mga otoridad sa ilang nahimutangan.

Gitanggong karon ang mga suspetsado sud sa selda sa kapulisan sa Panabo. (Marvin Pineda)