4 gidagit

Thursday, May 13, 2010

TULO ka mga sundalo ug usa ka sakop sa Citizen Armed Forces Geographical Unit (Cafgu) ang gidagit sa mga gituohang sakop sa rebeldeng New People's Army (NPA) didto sa lungsod sa Mawab, Compostela Valley Province.

Giila ang mga gidagit nga mao sila Corporal Ariel Asumo, Corporal Eduardo Alcala, Corporal Marcial Bawagan ug Cafgu Victor Pitogo, pulos nakadestino sa Limbo Patrol Base sa 72nd Infantry Battalion sa Philippine Army nga nakabase sa sa Barangay Limbo, lungsod sa Maco, Compostela Valley Province.

Have something to report? Tell us in text, photos or videos.

Base sa report sa Comval Province Police Provincial Office, nasayran nga ang pagpangdagit nahitabo sa alas 12:00 sa udto niadtong Miyerkules.

Giingon nga mitambong ang duha ka mga sundalo ug kaubang Cafgu sa adlaw nga natawhan sa anak sa nadagit sab nga sundalo nga si Cpl. Bawagan sa iyang panimalay didto sa Barangay Sawangan, lungsod sa Mawab.

Samtang naglingaw-lingaw ang nahisgutang mga sundalo, kalit miabot ang wa matinong gidaghanon sa mga gituohang sakop sa rebeldeng New People's Army (NPA).

Si Jenny Bawagan, asawa ni Cpl. Bawagan, nagbutyag sa mga otoridad nga pugsanung gipasakay ang mga biktima sa usa ka kolor itom nga van sa mga rebeldeng NPA.

Wala nakahimo pagsukol ang mga sundalo sanglit wala silay armas niadtong higayona dihang gitionan sila og armas sa mga rebelde.

Mga biktima gituohang gidala sa mga midagit didto sa Barangay Sangab, lungsod sa Maco.

Si Capt. Emmanuel Garcia, Public Affairs Office chief sa 10th Infantry Division, nagbutyag nga ang midagit sa mga biktima sakop sa Front Committee 2 sa NPA nga mao sab ang responsable sa pagpamanhig nga nahitabo niadtong Martes didto sa Maragusan, Compostela Valley Province.

"The NPAs were reportedly disheartened due to the loss of most of their favored candidates both in local ang national political arena. The peaceful conduct of election was a big slap on their face for insinuating a chaotic polls and even floating the idea of failure of election," ni Garcia sa Superbalita.

Sa gihimong press conference sa militar kagahapon, giingon nga gihimo sa mga rebelde ang pagpangdagit sa mga biktima aron matabunan ang ilang dakong sayop nga nahimo didto sa Maragusan niadtong Martes.

"The attack is a desperate effort to cover their blunder in the Maragusan massacre last Tuesday," ni 10th ID commanding officer Maj. Gen. Carlos Holganza kagahapon.

Ang insidente miresulta sa kamatayon sa lima ka mga tawo ug misamad og laing dose ka mga indibidwal nga naglangkub sa mga BEI, pollwatchers ug mga sundalo nga sakop 66 Infantry Battalion sa Philippine Army.

Sa maong insidente namatay si Mercedita Negro, pollwatcher ni Maragusan Mayor Cesar Colina kinsa nagpasubli sa samang posisyon.

Namatay nga sundalo mao sila Sgt. Jose Osman, Pfc. Macrell Bakil, Cafgu Leonelo Maglangit ug Cafgu Teodoro Camingawan.

Mga sibilyan nga nasamdan sa insidente mao sila Darwin Obello, pollwatcher ni mayoralty candidate Arsenio Yanong; Milagros Restauro ug Lita Tablingun, pulos pollwatchers ni Mayor Colina.

Mga sundalo nga samaron mao sila Staff Sgt. Remy Inoslay, Sgt. William Erot, Pfc. Nasser Ukoman, Pfc. Romeo Felix, Pfc. Jhonrie Toytoy, Pfc. John de Vera, Pfc. Rey Toledo, Pfc. Barahama Maadil ug Pvt. Datu Ali Akmad.

Giingon nga lulan ang mga biktima sa usa ka dumptruck paingon sa Maragusan Municipal Hall aron motambong sa pagahimuong canvassing apan gibanhigan sila sa mga rebelde dihang miabot sila sa Sitio Sarangga, Barangay Mahayahay, Maragusan. (Marvin Pineda/Alger Dura)