4 ka netibo nahilo

Sunday, March 21, 2010

UPAT ka mga netibong Manobo ang na-hospital human sila nangalanag didto sa probinsiya sa Cotabato.

Subay sa taho gikan sa Cotabato Police Provincial Office, nga alas 11:20 sa buntag, Marso 19, upat ka mga miyembro sa pamilyang Dalaom sa President Roxas ang gidala sa Cotabato Provincial Hospital human sila nahilo sa ilang gikaon nga wild yam o kayos atol sa ilang paniudto.

Have something to report? Tell us in text, photos or videos.

Hinuon, human sa makuting pagtambal nga gihimo sa mga doktor, gideklarar nga luwas na ang upat sa makuyang kahimtang.

Sagad sa mga biktima, human nakakaon sa kayos, nakasinati og pagsakit sa tiyan, nagsuka-suka, ug nangalipong.

Matud ni Datu Agjili Dalaom nga napugos sila sa pagka-on og wild yam o kayos gumikan kay wala na silay mapuslan sa ilang mga tinanom nga mais ug humay nga grabeng naapektuhan sa hulaw.

Gitahasan na ni Cotabato Governor Jesus Sacdalan ang Provincial Health Office nga tutukan ug susihon ang sitwasyon sa mga lumad nga nabiktima sa pagkalanag human mikaon sa kayos.

Kapila na nahitabo nga may lumad nga nahilo sa pagkaon sa wild yam. Apan sila nagsulti nga wa silay laing mabuhat tungod kay nagkahurot na ang ilang pananum nga nadaut sa El Niño. (Edgardo Fuerzas)