UPAT ka mga tawo ang namatay samtang 35 ang samdan sa nahitabong pagbusikad sa bomba didto sa siyudad sa Cotabato Domingo sa buntag.

Matud sa taho sa Cotabato City Police Office, nahitabo ang pagbusikad, atubangan mismo sa Immaculate Conception Cathedral sa Cotabato City mga alas 8:30 sa buntag samtang gihimo ang misa.

Mga namatay nailhan nga sila Allen Diaz, 9, Cajar Ullo, 27, Ruby Ramirez, 24, ug usa ka wala mailhi tungod kay nabungkag og maayo ang lawas.

Lakip sa mga nasamdan ang pito ka mga sundalo nga nagbantay sa dapit.

Ang bomba, gibutang duol sa Elsie Omega Lechon House sa Parang Road kanto Macacua Sts., diin daghan ang mga tawo niadtong tungora.

Si Cotabato City Police Chief Superintendent Willie Dangane nagkanayon nga improvised explosive device (IED) ang gigamit sa mga suspek.

Mga biktima, gidala sa Cotabato Regional and Medical Center, Notre Dame Hospital, ug Cotabato Emergency Hospital.

Sa pakighinabi sa Bombo Radyo kang 6th Infantry Division spokesman, Lt. Col. Jonathan Ponce, gikumpirma niini nga may gigunitan nga suspek ang mga otoridad nga karon, gipailawom sa imbestigasyon.

Gimando na sab ni Cotabato City Mayor Muslimin Sema ang paghimo sa hugot nga imbestigasyon sa maong pagpamomba aron manubag ang mga mihimo niini.