ANG militar naglutos karon sa mga dautang grupo sa probinsiya sa South Cotabato.

Ang kapulisan nag-ula sa mga napatay nga sila Tata Kungan, anak ni Kumander Jojo, Ali Tagunoy ug laing duha nga wala pa gyud mailhi sa mga otoridad nga giingong mga miyembro sa "Sipot Gang".

Sigun sa taho gikan sa Tactical Command Post sa 6th Infantry Division sa Philippine Army nga banda alas 4:00 sa hapon, Nobyembre 21 nagpatrolya ang mga sakop sa 27th Infantry Battalion nga gipangulohan ni Colonel Joshua Santiago dihang ilang gikapinusilay ang gibanabana nga 20 ka mga ginsakpan ni Kumander Jojo sa Sipot Gang sa sitio Kiantay, barangay Upper Sepaka, Surallah.

Milungtad og 45 minutos nga sinukliay og mga bala tali sa duha ka mga grupo nga migamit sa mga tag-as nga matang sa armas.

Miatras ang mga rebelde sa diha nga gipabuthan sila sa kasundaluhan kinsa migamit usab og 90RR nga bazooka, ug gibiyaan ang ilang mga kauban nga wala nay kinabuhi.

Narekober gikan sa mga sakop sa Sipot Gang nga napatay, ang usa ka m16 armalite rifle, duha ka mga m14 rifles, usa ka m1 garand rifle ug mga buhing bala.

Matud ni Santiago, nga ang grupo ni Kumander Jojo, maoy mi-ambush patay kang barangay chairman Ronnie Cabra sa barangay Upper Sepaka.

Mga rebelde gilambigit sab sa kasong cattle rustling, extortion, robbery hold-up ug pagpangsunog sa mga kabalayan sa mga sibilyan.

Nagpadala na og hinabang si South Cotabato Governor Daisy Avance-Fuentes ngadto sa gatusan ka mga pamilya nga namakwet gikan sa mga apektadong dapit.

Dugang puwersa sa militar ang miabag karon sa paglutos sa grupo ni Kumander Jojo nga gitumbok sab nga miyembro sa lawless Moro Islamic Liberation Front (MILF) group. (Edgardo Fuerzas)