USA ka 49 anyos nga lalaki ang gipusil sa nag-inusarang suspek samtang nagkaon sa iyang panihapon sud sa ilang panimalay sa Purok Durian, Lim Extension, dakbayan sa Digos, Martes sa gabii.

Kapulisan nagtuo nga personal nga atraso ang posibleng rason sa pagpatay sa biktima.

Si Police Officer 2 Benjie Gemina, investigation officer sa Digos City Police Office, nag-ila sa biktima nga si Gregorio Diez, molupyo sa maong dapit.

Matud ni Gemina nga daling nipahibawo kanila ang anak sa biktima nga si Rachel, human kalit gisaka sa nag-inusarang suspek ang ilang bay ug gipusil ang iyang amahan.

Ang imbestigasyon sa DCPO nagbutyag nga nailhan sa biktima ang suspek nga mao si alyas Al, kinsa daling nisibat human nahitabo ang krimen.

Biktima daling gidala sa balay tambalanan human kini naka-angkon og samad pinusilan sa nagkadaiyang parte sa iyang kalawasan.

Padayon sab kini nga nagpaalim sa samad pinusilan nga naangkon.

Di pa masuta sa kapulisan ang kalibre sa armas nga gigamit sa suspek sanglit ila pang gipangita ang mga baseyo sa bala sa ilang pagbalik kagahapon sa buntag didto sa lugar diin nahitabo ang krimen.

Ang suspek padayong gi-ukoy sa kapulisan aron patubagon sa salaud nga nahimo. (Dondon Dinoy)