LIMA ka mga pamilya ang apektado human nga gihapak sa kusog kaayo nga hangin ang Sitio Balon, Barangay San Isidro, Padada, Davao del Sur.

Sumala sa gipagulang taho sa Municipal Disaster Coordinating Council (MCDC), kalit nihapak ang kusog kaayong hangin sa maong lugar apan maayo na lang kay daling nakamata ang mga biktima nga nahinanok sa pagkatulog niadtong higayona.

Usa si Jolito Comahig, 30, kinsa nagkapuliki sa pagpukaw sa iyang asawa aron maluwas ang usa ka tuig nilang bugtong anak.

"Pagtan-aw nako nilupad na among atop, mao to nagdali mi pagdagan sa gawas," sulti niini sa pakighinabi sa Sun.Star Superbalita.

Sumala ni Comahig, di niya makalimtan ang kusog kaayong haguros sa hangin nga apil unta silang molupad kon wa pa makadagan.

Bisan ang 70 anyos nga si Eustiquio Lumagbas Sr., nitataw nga nagtuo siyang mamatay na sila niadtong taknaa human natumbahan og haligi nga kahoy ang ilang balay.

"Perte gyung kusuga, nakurat gyud mi ug wa makatoo nga mahitabo to," pung ni Lumagbas.

Gihulagway sa mga lumolupyo nga nilupad ang lima ka bay kapin 30 metros gikan sa yuta ug nalagpot sab kapin 30 metros gikan sa gibarogan niini.

"Maayo na lang kay nakamata mi kay og wa pa delikado gyud," dugang ni Lumagbas.
Matud nila, wa sila magdahom nga mahitabo kadto sanglit nindot ang panahon niadtong gabhiona.

Nagpagula dayon og tabang nga pagkaon ang munisipyo alang sa mga biktima, sulti ni Municipal Administrator Frashel Guererro.

"First time ni nahitabo sa among lugar wa mi masayod kon ngano," pasabot ni Guerrero kinsa nidason nga nagtuo silang hatod kini sa climate change.

Daling nihimo og tigom ang mga barangay opisyales sa lugar kagahapong adlawa aron hisgutan ang pag-relokar sa mga biktima.

Si Barangay Kagawad Ruel Patalinghug, nikanayon nga di pa nila masuta kung pila ang danyos apan nisaad nga magtigom sila aron makapagawas og pundo nga ikatabang pagtukod og balik sa nagubang bay sa mga biktima.

Ang mga biktima, temporaryong nanimuyo sa ilang mga silingan ug sa ilang mga kaparyentehan sa dapit. (Orlando B. Dinoy)