MAAYONG pagkalampaso ang usa ka 66 anyos nga tiguwang lalaki kinsa nagmaneho sa iyang trisikad human nabanggaan sa usa ka Tamaraw FX didto sa dalang Rafael Castillo, Barangay Agdao Centro, siyudad sa Davao.

Ang insidente nahitabo sa alas 3:20 sa kaadlawon kagahapon nga miresulta sa kamatayon ni Mauricio Taca, nagpuyo sa Sta. Lucia, Barangay Agdao Centro.

Base sa blotter sa Sta. Ana Police Station, ang biktima nagsubay sa dalang R. Castillo paingon sa Agdao Proper apan nabanggaan siya sa sakyanan (plate number TKR-302) nga gimaneho ni Alden Solatorio, 28, minyo, ug nagpuyo sa Dacoville Subdivision, Barangay Dumoy.

Nasayran nga gisundan ni Solatorio si Taca apan wala kini nabantayan mao nga gilampaso ang biktima mga 200 metros gikan sa dapit diin siya nadumbolan.

Ang biktima gideklara sa mga paramedics sa Central 911 nga dead on the spot tungod sa kakusog sa impak sa bangga.

Mga imbestigador nagbutyag nga posible nga kusog kaayo ang dagan sa Tamaraw FX mao nga wala nabantayan ang biktima.

Si Solatorio gidala sa mga pulis didto sa Davao Medical Center (DMC) aron ipailawom sa liqour test sanglit nanimaho kini og ilimnon nga makahubog.

Giandam na sa kapulisan ang kasong reckless imprudence resulting to homicide and damage of property batok sa drayber.(AD)