Banakon napatay sa mag-uuma

LAING banakon na sab ang gihatod sa usa ka mag-uuma didto sa Bansalan Police Station human iyang napatay didto sa iyang umahan sa Barangay Bitaug, Biyernes sa hapon.

Si Inspector Reniel Raotraot, deputy chief of police, nikanayon nga nakit-an ang mao nga bitin ni Virgilio Mamites samtang nag-harvest kini og goma sa iyang umahan.

Ang mag-uuma nga nahinabi sa Sun. Star Superbalita, nitataw sab nga maayo na lang kay iyang nabantayan ang bitin ug napatay niya kini.

"Nakalingi dayon ko kay nikanaas man unya pagtan-aw nako banakon gyud pero mura man og naluya gud ang bitin atong higayona," sumala niini.

"Sa wa pa nako siya napatay putol na daan iyang ikog, nagtuo ko nga nakakita siguro to og bugno sa laing hayop," dason sa mag-uuma.

Adlaw'ng Martes, dihang gihatod sa usa ka molupyo sa Barangay Takul, sakop sa lungsod sa Magsaysay, Davao del Sur ang laing banakon didto sa ilang buhatan.

"Akong gipabalik didto sa Magsaysay Police Station kay dili man to namo area gud ilang lugar. Nagtuo siguro sila og nangolekta mi og patay nga banakon diri," tataw ni Raotraot nga nipasiaw og istorya.

Bag-uhay lang napatay ang 37-anyos nga mag-uumang si Rodelito Gayunga didto sa Barangay Balabag, siyudad sa Digos human mapahit sa banakon.

Apan si Chief Inspector Anthony Padua, City Police Director, nikanayon nga igo lang nilang nadawat ang impormasyon apan wa nitaho kanila ang pamilya sa biktima.

Dinhi sa lalawigan, tulo na ka mga tawo ang napatay sa maong halas sud niadtong bulan sa Pebrero, mao nga hugot nga nag-awhag ang otoridad nga mag-igmat gyud ilabi pa kon moadto sa ilang umahan.

Gilantaw nga ang kainit sa panahon hatod sa El Ni¤o maoy nag-aghat sa mga bitin nga mogawas sa ilang gitaguan.

Apan, hangtud karon di pa masuta sa mga eksperto kun nganong nia na sa probinsya ang maong matang sa halas human didto kini unang nabaniog sa Davao Oriental. (Orlando B. Dinoy)