ANG kapulisan nagpahimangno sa tanang motorista nga dili magmaneho nga hubog ug kinahanglan nga magsul-ob gayud og helmet aron dili madisgrasya sa kadalanan.

Ang pahimangno gikan sa mga imbestigador sa Buhangin Police Station human namatay ang usa ka drayber sa motorsiklo kinsa giingon nga nagmanehong hubog ug wala magsul-ob og helmet sa alas 12:50 sa kaadlawon niadtong Sabado.

Ang drayber giila sa pangalan nga si Richard Pace, 32, nagpuyo sa NHA Buhangin, Barangay Buhangin Proper, siyudad sa Davao.

Base sa imbestigasyon sa kapulisan sa Buhangin, si Pace maoy nagmaneho sa Loncin nga motorsiklo, dunay plate number IP-6531 nga giangkasan sab nila Roland Calbunero, 43, nagpuyo sa Kilometro 12, Barangay Sasa ug Bonjing Medalla, 25, nagpuyo sa San Vicente, Barangay Buhangin Proper.

Sila Calbunero ug Medalla gitambalan karon sa mga doktor sa Davao Medical Center (DMC), apan si Pace giingon nga namatay nabangga sa Fuso Wing Van, dunay plate number MDH-445, gipanag-iyahan sa Prime Marketing Corporation ug gimaneho ni Ricky Morta, 31, nagpuyo sa Purok Gumamela, Ipil, Surigao del Norte.

Giingon nga nag-una ang sakyanan ni Morta sa motorsiklo ni Pace samtang nagsubay sa Diversion Road apan dihang miabot sila sa APFSLAI Building duol sa Camp Catitipan misuway pag-overtake si Pace sa laing motorsiklo apan naalanganin siya mao nga nabangga sa van.

Giingon nga hubog ug wala nagsul-ob ang drayber og helmet niadtong higayona mao nga namatay siya.

Ang duha ka mga sakyanan atua karon sa kustodiya sa kapulisan sa Buhangin samtang gisusi pa ang maong hitabo. (AD)