Barangay tanod gitumba

Wednesday, September 8, 2010

USA ka barangay tanod gipusil patay sa gituohang mga sakop sa New People's Army (NPA) didto sa Purok 5, Barangay del Pilar, lungsod sa New Corella, Davao del Norte, Lunes sa gabii.

Nailhan ang biktima nga mao si Getolio Baquero, 53, ug molupyo sa Purok 5, Barangay Poblacion, sa susamang lungsod.

Have something to report? Tell us in text, photos or videos.

Post your reaction to the Manila hostage crisis

Sa report gikan sa Davao del Norte Police Provincial Office nasayran na pasado alas 7:00 sa gabii, nagbaktas ang biktima pauli na unta sa iyang balay gikan nag-inom uban ang iyang ig-agaw sa dihang giatangan sa duha ka wa mailhing mga lalaking gituohang mga rebelde ug sa way paglangan gipusil gamit ang kalibre .45 nga pistola.

Ang biktima nahiagum og samad pinusilan sa nagkadaiyang parte sa iyang kalawasan ug gidala sa Davao Regional Hospital sa siyudad sa Tagum.

Apan igo lamang gayud nakaabot sa maong ospital ang biktima, gideklarang dead on arrival sa mga doktor.

Human sa pagpamusil, mga suspek dayong misibat padulong sa wa matino nga lugar.

Ang biktima matud pa kanhi sakop sa Civilian Volunteer Organization (CVO) panahon ni kanhi Mayor Jose Ricarido Federiso sa lungsod sa New Corella ug aktibo karon nga barangay tanod sa ilang dapit.

Ang biktima kanhi sab nalambigit sa mga operasyon sa militar batok sa NPA ug apil siya sa mga nahitabong engkuwentro.

Gituohan nga mga rebelde ang mipatay sa biktima tungod sa iyang kalambigitan sa operasyon sa militar batok insurhensiya.

Hinuon, dili pa sab matumbok sa kapulisan kung NPA ba gayud ang mipatay sa biktima ug padayon ang ilang imbestigasyon. (Marvin Pineda)