Nagpadayon ang rescue operations sa mga pasahero sa nitakilid nga Superferry 9 sa dapit sa Zamboanga Peninsula.

Sumala sa taho nga ang barko nga adunay lulan nga 832 ka mga pasahero migikan sa pantalan sa dakbayan sa General Santos niadtong kaadlawon sa Sabado ug naglawig padung sa Iloilo. Apan pag-abot sa Siocon, Zamboanga del Norte gihapak kini sa mga dagkong bawod tungod sa kusog nga hangin mao nga mitakilid hangtud naunlod.

Sa wa pa naunlod ang barko, ang kapitan mimando nga manggawas ang mga pasahero aron maluwas.

Matud ni Jess Supan, vice president for safety and security sa WG&A, nga nakagawas na sa barko ang tanang pasahero ug nakatakdang pasakyon na lamang kagahapon sa mga rescue boats.

Gibutyag sab ni Philippine Coast Guard spokesman Armand Balilo nga nadala na sa siyudad sa Zamboanga ang mga naluwas nga pasahero sa Superferry 9.

Gidugang ni Balilo nga ang mga namatay naglakip sa usa ka bata ug usa ka tigulang. Duna silay mga life vests apan gumikan sa sobrang katugnaw ug kahadlok, wa kalahutay.

Hinuon ang management sa Superferry nagpahayag nga andam kini motabang ngadto sa mga biktima sa trahedya, samtang nagpadayon na ang imbestigasyon sa mga otoridad aron matumbok ang tinuod nga hinungdan sa hitabo.

Sa laing bahin, Si Commander Charlie Ramses, commander sa Philippine Coast Guard sa siyudad sa General Santos, nagbutyag dihang gihinabi sa Bombo Radyo General Santos kagahapon sa buntag nga gihapak sa kusog nga hangin ang barko mao nga nitakilid.

"According sa nakausap namin na isang crew ng SuperFerry 9, hinampas ng malakas na hangin ang barko at namatayan sila ng power at makina at hindi na sila nakabawi," pahayag ni Ramses.

"Hindi rin dahil sa mga kargamento kung bakit tumagilid ang barko, hinampas ito ng malakas na hangin. Nung umalis ang barko dito sa Gensan kahapon (Sabado), in-inspect namin ang mga kargamento at nasa ayos naman ang lahat," butyag sa opisyal.