PANAHON sa Kadayawan Festival. Dili malikayan ang pagdagsa sa mga prutas, bulak ug mga produkto gikan sa atong kabukiran.

Nagdagsa sab ang mga fairs ug product exhibits gikan sa nagkalainlaing lugar sa nasud diin gipakita ang world-class quality sa mga produkto nga gikan sa atong nasud.

Sa niaging semana, niabot dinhi sa dakbayan ang duha ka opisyal sa Philippine Business for Social Progress (PBSP)- Manila nga nagpromotar sa Business in Development (BiD) Challenge 2009 karong tuiga.

Usa kini ka tinuig nga contest sa mga maayong produkto ug negosyo sa Pilipinas nga puwedeng bubo-an og puhohan sa mga investors sa tibuok kalibutan.

Ilang gianhi ang Davao tungod kay tulo sa mga winners sa BiD Challenge 2008 gikan dinhi sa Davao ug matud pa nila nga dako ang potensiyal sa taga Davao nga modaug tungod sa kadaghan sa rekursos dinhi ug mga tawong may talento sa pagmugna og produkto ug negosyo.

Mahinumduman nga midaug ang Durian Fiber Sheets sa akong higalang si Betty More sa Katakus, Inc. Gihimong nindot nga lampshades ug uban pang produkto ang panit sa Durian nga atong ginalabay.

Nidaug usab ang Happy Earth sa akong sangay nga si Emmanuel Quisol diin iyang gihimong organic fertilizer ang mga panit sa saging ug basura gikan sa lubi.
Siyempre nidaug usab ang akong entry nga Colored Rice diin gibaligya namo ang iron rice premix nga isagol sa atong bugas aron mahimong iron fortified rice nga mopaubos sa iron deficiency anemia sa nasud.

Gawas kanamo, daghan usab nga mga finalists gikan sa Davao sama sa Giant Bananas ug Shoestring Bananas ni Reginald Magnaye, Social Enterprise ni Penpen Libres, S-9 Micro-Biotech Engine Oil ni Sarlo Gentapan.

Matud pa sa mga bisita nga nidayeg sila sa talagsaong kalidad sa mga produktong ilang nakita sa mga fairs dinhi sa Davao busa buot nilang daghan untang mga moapil sa challenge karong tuiga.

Busa kadtong buot moapil sa challenge mo-log-in sa www.bidnetwork.org/philippines. May format sa 3-page business application sa maong website nga may deadline nga Agosto 30. Kung mapilian ang inyong entry, diha na kamo mohimo og business plan ug financial plan.

Daghan ang modaug karong tuiga nga moabot og 20 samtang 8 ra sa miaging tuig nga nakadawat og tag P100 ka libo samtang duha kanila puwedeng ipadala sa the Netherlands ug may tsansang modaug og P2 milyon.

Gawas niini, may posibilidad pang tabangan ang mga nakadaug ug finalists sa mga investors.

Ang proyekto nga Rags-to-Riches sa Ateneo de Manila maoy nakadaug sa Netherlands ug nakadawat sila og 20,000 euro. Gihimo nilang nindot nga mga bags ang basura gikan sa Payatas nga nakapadako sa kita sa mga babayeng nagpuyo didto.

Dili kinahanglan nga nagsugod na ang inyong negosyo tungod kay may duha ka kategorya ang contest sama sa Start-up Business ug Established Business.
Tabangan usab kadtong mga finalists sa pag-presentar sa ilang plano ug sa pagpadagan niini kung mosugod na.

Bisan konsepto sa negosyo puwede ninyong ipadala aron lang masayran kung may padulngan ba ang inyong plano. Good luck ug send na!