Bilanggo gitodas

Monday, February 8, 2010

USA ka piniriso kinsa nagtinguha nga moikyas sa iyang selda ang napusilan ug namatay human niya giatake ang jail officer sa Davao City Jail sa alas 3:50 sa hapon niadtong Dominggo.

Napusilan mao si Rey Aragon Angeles, 26, nabilanggo sa Maximum Cell number 3 ug nagpuyo sa Puting Bato, Barangay Riverside, distrito sa Calinan, siyudad sa Davao.

Have something to report? Tell us in text, photos or videos.

Si Angeles dunay kasong murder nga nakadoket sa criminal case number 65, 564-09 sa Regional Trial Court (RTC), Ecoland.

Base sa spot report nga gipirmahan ni Davao City Jail officer-in-charge warden Jail Senior Inspector Ian Glenn Ocmen, nasayran nga mikuyog si Angeles sa panon sa mga bisita nga miguwa sa  bilanggoan ug mikatkat sa ikaduhang andana dayon giatake si JO1 Rogelio Go nga didto nagbantay sa Post number 2.

Si Angeles gisanta pa sa iyang kauban nga piniriso nga si Rene Parejas apan wala kini manumbaling ug mipadayon sa pag-atake kang Go.

Si Go nakahimo sa pagpalayo kang Angeles niadtong higayona aron maluwas ang iyang kaugalingon apan miadto ang nauwahi sa nahimutangan ni Senior Jail Officer 3 Arnold Sierra kinsa nakahimo sa pagsipa nga miresulta sa pagkatumba niini.

Human natumba ang piniriso misamot hinuon ang iyang kasuko mao nga giatake na sab si Go gamit ang usa ka improvised nga ice pick.

Si Jail Officer 1 Paquito Eyao, duty sentinel sa Post number 4, kinsa nakasaksi sa gidangatan sa iyang mga kauban nakahukom nga  pahunongon si Angeles pinaagi sa pagpabuto sa iyang service firearms.

Bisan sa gihimong pagpabuto ni Eyao, misamot ang kasuko ni Angeles ug mipadayon gihapon siya sa iyang pagpangatake mao nga mibuto na sab si Eyao hangtud nga natumba si Angeles.

Si Angeles nakaangkon og samad sa atubang ug likod mao nga gidala siya sa Davao Medical Center nila Senior Jail Officer 3 Sierra ug Jail Officer 1 Raul Abrina apan namatay kini dihang sa maong tambalanan.

"Gusto niyang makalabas sa jail kaya gusto niyang makuha ang aking service firearms," pahayag ni Go dihang nahinabi sa Superbalita.

Mga sakop sa Talomo Police Station ug Scene of the Crime Operatives nga maoy nag-imbestiga sa hitabo nakahipus og duha ka basiyo ug slug sa .45 kalibre nga pistola samtang nakuha sab ang usa ka tinalinisan nga tooth brush gikan sa underwear ni Angeles.

Ang armas uban ang 18 ka buhing bala nga gipanag-iyahan ni Eyao boluntaryong gitunol ni Jail Senior Inspector Ocmen ngadto sa kapulisan sa Talomo.

Si Eyao gipailawom na sa paraffin test samtang ang armas gipailawom sa ballistic examinition sa kapulisan.

"Ongoing ngayon ang investigation ng Bureau of Jail Management and Penology Regional Office 11, Regional Investigation Division and Talomo Police Station," suma ni Ocmen dihang gipangutana sa Superbalita kagahapon. (AD)