WA magdahom ang usa ka inahan nga unayon ug buot unta siyang patyon sa iyang kaugalingong anak nga iyang gihatagan og kahayag human niya kini gihimugso ibabaw ning kalibutan.

Nakalingkawas ang biyudang si Simplicia Sarabia, 46-anyos, usa ka mag-uuma human siya gitigbas sa anak nga si Cristito Sarabia, 19.

Nahitabo ang insidente didto sa Sitio Bangoy, Barangay Poblacion,
Matanao, Davao del Sur, alas 7:00 sa gabii niadtong Miyerkules.

Sigun sa taho ni Inspector Melgrace Driz, nigamit ang suspek og mahait nga sundang dayon tigbas apan maayo na lang kay nakabantay ang inahan ug naigo lamang sa walang bahin sa iyang kamot.

Tungod kay nahiagom og dakong samad tinigbasan sa kamot niagas ang daghan dugo mao nga gidali paghatod sa mga nitabang nga otoridad ngadto sa Davao del Sur Provincial Hospital.

Matod ni Driz, wa nagkasinabot ang mag-inahan niadtong tungura hinungdan nisangko sa madugoong hitabo ang ilang komprontasyon.

Wa makatuo ang kapulisan nga mahimo kini sa 19-anyos nga suspek kinsa paspas nga nikagiw ngadto sa wa matinong direksyon aron talikdan ang krimen nga iyang gihimo batok sa inahan.

Gipangita na karon sa kapulisan ang suspek.