USA ka dakong klase sa bomba nadepyus didto sa Pikit, North Cotabato niadtong Biyernes sa kahaponon.

Sumala sa nahagpat nga taho gikan sa 6th Infantry Division Philippine Army nasayran nga banda alas 4:00 sa hapon, Enero 2, nakit-an sa mga sibilyan kilid sa hauler truck nga gipanag-iyahan sa negosiyanteng si Joel Mangunay ang usa ka Improvised Explosive Device nga gisulod sa karton.

Ang maong bomba ginama sa usa ka bala sa 60 mm mortar nga dunay blasting caps, mga wirings ug command detonated gamit ang Nokia 3310 cellphone.

Dali nga nagresponde ang mga ginsakpan sa Explosive Ordnance Disposal Battalion sa Philippine Army ug gidepyus ang bomba.

Gipamahayag ni Pikit Chief of Police Senior/Inspector Elias Dandan nga posibleng hinimuan kini sa nagpailang Red Spider Group nga positibong nagpadala og extortion letter ngadto kang Mangunay.

Nangayo og P250 mil ang mga suspek ug nanghulga nga kon siya magmagahi adunay bombang pabuthon sa tindahan sa biktima.

Gidugang ni Dandan nga nailhan na nila ang mga suspek gumikan adunay tawo nga nakakita sa suspek sa diha nga gibilin ang bomba ug dali nga mi-eskapo sakay sa usa ka motorsiklo.

Giklaro ni 602nd Brigade Commander Colonel Alejandro Estomo nga ang Red Spider Group, usa ka organisadong grupo nga nagbag-o lang og pangalan apan mga miyembro lang gihapon kini sa Alkhobar Terror Group.

Milihok na ang militar ug kapulisan aron madakpan ang naasoy nga grupo nga labad sa ulo sa mga negusiyante didto sa Central Mindanao.(Edgardo Fuerzas)