Bomba nakaplagan sa Cotabato

Wednesday, April 28, 2010

USA ka dakong matang sa bomba ang napalgan didto sa siyudad sa Cotabato.

Base sa taho gikan Cotabato City Police Office, nasuta nga banda alas 7:40 sa gabii, Abril 27, nakit-an sa mga kabataan nga nangukay og basura atubangan sa People's Parts and Hardware sa Sinsuat Avenue, Barangay Poblacion 6 ang usa ka kolor puti nga plastic bag.

Have something to report? Tell us in text, photos or videos.

Dihang ila kining gihiling nakurat na lamang sila human makita ang usa ka Improvised Explosive Device (IED) nga hinimo sa usa ka bala sa 81 mm mortar, dunay mga wirings, blasting cap ug triggering mechanism gamit ang Sony Ericsson cellphone.

Dali nga mitaho ang mga kabatan-onan sa lugar sa ilang nakita.

Abtik sab nga miresponde ang Explosive Ordnance Disposal Team sa Philippine Army, diin ilang gidepyos ang bomba gamit ang water cannon sa City Fire Department.

Matud ni Cotabato City Police Director Willie Dangane nga kun nakabuto pa ang bomba daghan gyud ang mapatay ug masamdan gumikan kay bala sa 81 mm mortar ang gigamit sa mga suspek.

Gidugang ni Dangane nga posibleng hinimuan kini sa mga grupong buot guboton ang nagsing-abot nga piniliay.

Gimando na ni Cotabato City Mayor Muslimin Sema ngadto sa kapulisan nga palig-unon pa ang ilang pagbantay, pagawas ug pasulod sa siyudad uban ang tabang sa militar aron di magmalampuson ang dautang plano sa mga rebeldeng grupo ug terorista. (Edgardo Fuerzas)