USA ka bomba ang nabangalan sud sa compound sa usa ka lumber didto sa dalang Quezon Avenue, siyudad sa Digos.

Sa gipagulang taho gikan sa Explosive Ordnance and Disposal Team (EODT) nasayran nga mga alas 4:40 ang takna sa hapon dihang nadawat nila ang notisya mao nga dali nila kining girespondehan.

Ang bomba nakuha didto sa Mindanao Lumber and Construction Supply.

Pung sa mga personahe sa EODT nga ang bomba usa ka klase sa 105mm projectile, taas ang kalidad sa maong eksplosibo.

Si Police Inspector Ferdinand Casiano, hepe sa EODT, nagbutyag nga maayo na lang kay nakit-an dayon kini sa caretaker nga si alyas Bobong, kinsa dali nga nagpahibawo kanila.

Nanaghap ang otoridad nga dugay na kining nahimutang sa lugar.

Di pa sab makasulti ang EODT kun gituyo ba kini pagbutang o nahibilin lamang kini sa lugar.

Dako ang pasalamat sa mga otoridad nga wa natandog ang bomba sanglit delikado kini kun moboto sanglit giingong makahimo sab kini sa paglupad ngadto sa kawanangan.

Subling nagpahimangno ang EODT nga mag-igmat ang katawhan ilabi na sa pagbantay sa mga katingad-ang butang aron di mahug sa disgrasya.

Bisan mga vintage bomb padayon gihapong gisuhid sa mga eksperto human gikataho nga daghan gihapon sa maong matang sa bomba ang nabiyaan dinhi sa lalawigan nga gigamit niadtong panahon sa giyera.

Gi-awhag karon sa otoridad ang matag usa nga motaho gilayon sa ilang buhatan ugaling makakita ug bisan unsang matang sa bomba ug likayan ang pagtandog niini aron di maalaut ang ilang kinabuhi. (Dondon Dinoy)