Brgy. Wilfredo Aquino: Voter's Education Campaign gihimo

Monday, March 15, 2010

SAMTANG nagkaduol ang labing una nga automated election sa nasud, naningkamot sab bisan ang mga barangay opisyal dinhi sa siyudad, aron matudluan ang mga molupyo niini kalabot sa bag-ong proseso sa piliay karong Mayo.

Niadtong Dominggo, nagtapok ang mga molupyo sa barangay Wilfredo Aquino, distrito sa Agdao sa Sarphil Gym aron maminaw sa himuong Voter's Education Campaign nga gipasiugdahan sa barangay.

Have something to report? Tell us in text, photos or videos.

Si barangay kapitan Leo Aquino, uban ang iyang mga kagawad, milusad sa maong voter's info campaign aron matudluan, mahatagan og ideya ang mga molupyo sa barangay kun unsa ang ilang buhaton panahon sa eleksiyon.

Sayo pa lamang sa buntag, hinay-hinay nga miabot sa gym ang mga tawo sa lugar.
Si barangay kagawad Tootsie Junsay, chair sa Committee on Education sa Agdao Proper maoy mihatag og pagpasabot sa mga tawo sa barangay.

Si Junsay, malipayon nga mipaabot sa iyang nahibaw-an kalabot automated election sa mga tawo sa barangay Aquino.

"Happy pud ko nga ma-share sa ilaha ang akong natun-an. Ako mismo nag-representa nga motabang sa kampanya," ni Junsay.

Si Aquino, mibutyag sab nga luyo sa voter's education campaign sa nakalabay nga adlaw, may serye pa sila sa pagpanudlo nga buhaton.

"Naa pay ubang series sa info campaign. Plano namo nga mobisita pa sa ubang purok dinhi, aron matudluan ang atong mga tawo sa sakto nga pagboto," niya atol sa pakighinabi sa Superbalita.

Mga molupyo nga midagsa sa gym, tutok kaayo nga naminaw sa gihimong pagpasabot ni Junsay kalabot automated election.

Pagpanudlo ipadayon

Aminado si Junsay nga daghan pa gyung botante ang walay igong kasayuran sa mamahimong dagan sa automated election karong Mayo.

"Admitted gyud na daghan pa ang wala'y ideya unsa ang ilang buhaton. Mao nga ako nga nakabalo, mihimo kog pamaagi nga makatudlo kanila."

Niya, mipailawom sab sila sa pagbansay ubos sa paggiya sa Commission on Elections.

Sumala pa nga una silang gipatawag alang sa voter's education campaign kun diin gitambungan kini sa mga barangay opisyal, functionaries ug uban pa.

"Dili gyud kami tanan nga barangay kagawads sa amoa ang nakatambong ato. Though ang mga functionaries namo natudluan, pero dili gyud assurance nga matudlo nila ni sa uban. Mao nga isip suporta ug tabang nangusog na lang pud ko sa pag-share sa uban sa akong nahibaw-an."

Human sa gihatag nga lecture ni Junsay sa mga molupyo sa barangay Aquino, gisunod sab ang pagtubag sa mga pangutana, butang nga angayang bantayan sa mga botante.

Libreng pay-per view

Luyo sa gihimong pagpanudlo sa automated election, naghinam-hinam sab ang mga mitambong tungod sa libreng pasundayag kalabot sa kumbati nila Manny Pacquaio ug Joshua Clottey.

Sa inisyatibo sa barangay council sa Aquino, gimuntar ang mga television sets nga mipakita sa undercard event, ug ang gihuwat nga binigwasay nila Pacman ug sa Ghanian boxer.

Bisan pa man og di kaayo kulba-hinam ang sinukmagay apan malipayon gihapon ang mga molupyo sa lugar, kasikbit nga barangay nga midayon didto tungod nasaksihan nila mismo ang pakigharong sa giilang boxing idol nga si Pacquaio.