Brownout makatabang sa mga pulitiko?

Friday, April 30, 2010

GILANTAW nga dako og ikatabang sa mga pulitiko ang matag adlaw nga rotating brownout dinhi sa probinsya sa Davao del Sur.

Mismong mga pulitiko niangkon nga dili pulos kadaot ang hatod niini ngadto kanila human na-obserbahan sa Sun.Star Superbalita nga daw hayahay nga naglibot-libot ang mga sakyanang nag-rekorida nga nagdala sa ngalan sa mga kandidato panahon nga way kuryente.

Have something to report? Tell us in text, photos or videos.

Usa si Jose Abad Santos Mayor Alexander Wangkay kinsa nilansad pagka gobernador niingon nga duna sab kini maayong epekto sa ilang kampanya.

Si Wangkay kinsa atua sa Tokyo, Japan alang sa away sa iyang tawo sa boxing karong petsa 30, niingon pinaagi sa telepono nga maglanog-lanog gyud ang ilang rekorida panahon nga way kuryente.

Apan matod ni Wangkay nga nag-depende lamang kini sanglit wa sab kini maayong ikadalit sa ubang pulitiko sama pananglitan kun way "generator set."

"Ako magdala gyud ko kanunay og generator panahon sa among rally kung naa ko diha. Pero mao lagi nadugangan na hinuon ang among gasto pagpalit pa lang daan," niya pa.

"Tungod pud sa brown-out adjustable among schedule," dason ni Wangkay, kinsa nidagan ilawom sa partidong Pwersa ng Masang Pilipino.

Bisan si Digos City Mayor Arsenio Latasa, kinsa nilansad pagka-bise gobernador ilawom sa Nationalist Peoples Coalition (NPC), nagkanayon nga maayo ang brown-out kun adunay generator.

"Sa amoa man gud mas sayo kang makatulog panahon sa brown-out kay gawas nga ngitngit di sab ika-kumpyansa ang sitwasyon karon," matod ni Latasa.

Apan si Davao del Sur Governor Douglas Cagas, kinsa nagpasubli ubos sa Nacionalista Party (NP), nagsulti nga dautan ang brownout alang niya.

Dinhi sagad mahitabo ang mga krimen sa palibot, pung ni Cagas.

"Ang brownout makatabang sa mga pulitiko nga magbuhat og dautan sa kangitngit sama sa pagguba sa mga tarpaulins, panaka og balay para manghulga ug pamatay," tataw ni Cagas.

Gituki sab niini nga gi-atol sa brown-out ang pagpatay sa lain niyang supporter.

"Last night, at 7 p.m. my Cagas Cares Barangay Coordinator of Baluntay, Don Marcelino was shot dead in his house when there was a brownout," panapos niya.

Sa kasamtangan, way mahimo ang katawhan sa lalawigan sanglit ang National Grid Corporation of the Philippines (NGCP) ang nagbuot kung unsang orasa palungon ug ibalik ang kuryente.

Halos kada adlaw sab nga himuon sa NGCP ang Manual Load Dropping (MLD) nga moabot og hangtod 12 ka oras. (Orlando B. Dinoy)