DA sugdan na ang 1 ka bulan nga cloud seeding

Thursday, March 11, 2010

GITAKDANG sugdan na sa Department of Agriculture (DA) sa probinsya sa Davao del Sur ang cloud seeding karong sunod semana.

Nasayran sa Sun. Star Superbalita nga niabot na sa P126 milyones ang danyos sa hulaw sa probinsiya ug grabeng naapektuhan mao ang mga maisan nga nidanyos og P90 milyones samtang P36 milyones alang sa humayan.

Have something to report? Tell us in text, photos or videos.

Sayo niini, nagsulti si Ernesto Miro, provincial agriculturist nga di pa angay'ng kabalak-an ang El Niño dinhi sa probinsya.

Apan gibutyag sa DA nga himuon na gyud ang cloud seeding karong sunod semana tungod kay di na matabang ang natagamtamang hulaw sa lalawigan.

Niangal na ang mga mag-uuma sanglit di na nila matamnan ang ilang mga basakan tungod kay nangliki na ang yuta gumikan kay wa gyud makatilaw og uwan.

Sulod sa usa ka bulan ang cloud seeding operation ug himuon kini katulo sa usa ka semana diin mogasto ang DA og P3 milyones.

Sa kasamtangan, gihuwat na lang sa DA gikan sa ilang Central Office ang eroplanong gamiton aron mosabwag og asin sa panganod nga mamahimong uwan.

Nanghinaut sab ang DA nga nindot ang tapok sa panganod atol sa ilang operasyon aron di masayang ang salaping gastuhon sa paghimo og artipisyal nga uwan. (Orlando B. Dinoy)